Distret sociosanitari dal Agri Aquileiês: trasferiment dai servizis li dal Ospedâl di Palme
miercus 3 di Setembar dal 2025
Tacant dai 20 di Avost
La Direzion dal Distret sociosanitari dal Agri Aquileiês e vise che dai 20 di Avost i servizis distretuâi di pertinence de sede di Palme a vignaran trasferîts li dal Ospedâl (Jalmic, vie Nadison 1 - cuarp E).
Il trasferiment si fasarà in plui dadis:
· dai 20 ai 22 di Avost a saran trasferîts i uficis dal diretôr, l'ufici dal miedi dal distret, l'ufici des curis paliativis e dal responsabil, la plateforme assistenziâl, l'ufici de Cjase de Comunitât, la sale riunions, il servizi riabilitatîf domiciliâr;
· il 1n di Setembar a vignaran trasferîts il servizi infermieristic domiciliâr, il pont unic di acès, il dipuesit farmacie, l'ambulatori infermieristic, i disvistidôrs, il magazen dipuesit gjenerâl;
· ai 2 e 3 di Setembar a vignaran trasferîts il servizi di continuitât assistenziâl, l'ambulatori distretuâl di assistence primarie, l'ufici sportel de anagrafe sanitarie, l'archivi aministratîf e la sale ristorazion.
Lis areis destinadis ai servizis distretuâi a saran logadis tal Cuarp E, al prin plan.
Sportel anagrafe sanitarie
Il sportel de anagrafe sanitarie al sarà al plan tiere (li dal ingrès de farmacie interne), simpri tal Cuarp E.
Dal 1n ai 5 di Setembar l'ufici de anagrafe sanitarie al sarà sierât, al sarà di gnûf in servizi cun lunis ai 8 di Setembar.
In câs di bisugne dal 1n ai 5 di Setembar si podarà contatâ il sportel de anagrafe sanitarie di San Zorç di Noiâr (vie Palme, 1 - 0431 624815 - martars e joibe des 9.00 aes 12.30 pueste eletroniche amm-dso-sangiorgio@asufc.sanita.fvg.it) o pûr il sportel di Çarvignan (vie Triest, 75 - 0431 387734 pueste eletroniche distretto.est@asufc.sanita.fvg.it)
Ambulatori distretuâl di assistence primarie (dotore Richer)
Cun miercus ai 3 di Setembar al vignarà trasferît intun studi tal Cuarp A (prin plan, aree ex Cardiologjie, coridôr de Radiologjie e Endoscopie) dal ospedâl di Palme: cheste colocazion e je provisorie, spietant che a finissin i lavôrs de Cjase de Comunitât locâl.
L'acès al ambulatori pai utents interessâts al sarà de jentrade principâl (parc pes machinis P1, Velario), lant sù al prin plan e indevant tal coridôr de Radiologjie e Endoscopie, a cjataran il studi medic pôc prin de Radiologjie.
Si podarà jentrâ ancje dal Cuarp E (parc pes machinis P3, ingrès Farmacie - Tecnologjie e Invistiments), simpri lant sù al prin plan e indevant tal coridôr de Radiologjie e Endoscopie, il studi medic al sarà dopo de Radiologjie.
No cambiin il recapit telefonic (368 464113) e i oraris di ativitât dal studi.