Dermatite atopiche: consults dermatologjics a gratis su prenotazion te Dermatologjie di Udin

A rivin a Udin i consults dermatologjics a gratis de campagne nazionâl “Dermatite atopiche? Di vuê si cambie”, puartade indenant cul patrocini di ANDeA (Associazion Nazionâl Dermatite Atopiche), che a àn chê di promovi la diagnosi e di judâ i pazients adults te remission de malatie midiant di apontaments su prenotazion cui miedis dermatologjics in diviers centris ospedalîrs di ecelence in dute Italie.

I consults a saran vinars ai 24 di Novembar li de SOC Dermatologjie dal Presidi Ospedalîr Universitari Sante Marie de Misericordie, direte dal Professôr Giuseppe Stinco, dome su prenotazion e fin al esauriment dai puescj a disposizion.

Par prenotâ l’apontament al è a disposizion il centri di contat dedicât, dal lunis al vinars, des 9.00 aes 17.00 cul numar 02 8290 0620.

La dermatite atopiche e je une malatie inflamatore croniche no infetive de piel, cuntun fuart impat su la cualitât de vite dai pazients. In Italie la percentuâl di cui che al patìs di dermatite atopiche e je une vore alte: tra il vot e il dîs par cent de popolazion adulte e presente cheste problematiche.

“Ancje in Friûl la dermatite atopiche e je une malatie une vore difondude – al sclarìs il Professôr Giuseppe Stinco, Diretôr de Cliniche Dermatologjiche de Aziende Sanitarie Universitarie Friûl Centrâl di Udin – sei te popolazion pediatriche sei tai adults. E je une malatie che e influìs in maniere une vore negative su la cualitât de vite dai pazients cun consecuencis impuartantis tai rapuarts sociâi e tes ativitâts scolastichis e di lavôr par vie de fuarte pice, a voltis dolorose, e pe presince di maglis di eczeme su dut il cuarp, dispès in zonis che si podin viodi ben tant che muse, cuel, grispis e mans. Une vore di personis no san di vê cheste malatie e tantis altris no san ancjemò dai grancj progrès terapeutics fats tai ultins agns. Par judâ chestis personis, i dermatolics de Cliniche Dermatologjiche di Udin a àn aderît a cheste iniziative cul obietîf di miorâ il percors di diagnosi de dermatite atopiche tai adults e di informâ su lis terapiis a disposizion par tornâ a dâ ai pazients la serenitât e la cussience che la malatie si pues tignîle sot control cun facilitât”.

“O sin dacuardi cul spirt di cheste impuartante iniziative – al dîs Mario Picozza, President di ANDeA – parcè che o crodìn che il screening al sedi un strument fondamentâl par permeti ai pazients di ricevi la diagnosi juste in anticip e duncje par judâju a tacâ il percors di cure plui valit pes singulis necessitâts di ognidun di lôr”.

“Dermatite Atopiche? Di vuê si cambie” e je puartade indevant in colaborazion cun ANDeA (Associazion Nazionâl Dermatite Atopiche) e midiant dal contribût incondizionât di AbbVie.

Par plui informazions: www.daoggisicambia.it