Lis demencis: sintoms, manifestazions e strategjiis di intervent
joibe 4 di Mai dal 2023
Cunvigne sabide ai 20 di Mai te sede de Comunitât di Mont dal Glemonàs
La incressite de popolazion anziane e l'aument consecuent dal numar di anzians cun problemis leâts ae autonomie e ae fragjilitât psichiche e cognitive a interoghin familiârs, operadôrs, volontaris e citadins sui gnûfs bisugns dai anzians e su lis gnovis formis di cure, assistence e supuart, in particolâr a pro des personis che a patissin di malatiis neurodegjenerativis tant che lis demencis o l'Alzheimer.
Il Servizi sociâl dai Comuns dal ambit teritoriâl dal Glemonàs e dal Cjanâl dal Fier-Valcjanâl, in colaborazion cu la Cooperativa sociale Itaca, al à promovût che nol è tant un percors formatîf e informatîf sul teme des demencis. La iniziative, struturade in trê fasis cun events distints che si son fats tra Novembar dal 2022 e Fevrâr dal 2023, e à tocjât tancj destinataris: familiârs di personis cun demence, assistents familiârs, operadôrs sociosanitaris, assistents sociâi e educadôrs.
La cunvigne «Le demenze: sintomi, manifestazioni e strategie d’intervento», tierç apontament dal percors, e je indreçade a ducj i citadins e e à l'obietîf di fâ cognossi lis malatiis dementigjenis, i lôr aspiets clinics, i compuartaments des personis maladis e lis terapiis farmacologjichis e psicosociâls principâls che si puedin doprâ par miorâ lis cundizions di vite dai malâts e dai lôr familiârs.
L’apontament al è fissât par sabide ai 20 di Mai dal 2023, des 9.00 aes 12.30, a Glemone, te sede de Comunitât di Mont dal Glemonàs.
Te cunvigne i partecipants a varan la oportunitât di svicinâsi a chestis tematichis acompagnâts des espertis Laura D’Ospina, psicolighe psicoterapeute (Lis demencis: i sintoms cognitîfs e lis lôr manifestazions comportamentâls), Gabriella Bellini, miedi gjeriatri (Lis terapiis farmacologjichis buinis pe demence) e Sabrina Degano, terapiste ocupazionâl (Lis terapiis psicosociâls).
Cun di plui, l’event al è orientât «ae promozion di une comunitât locâl sensibile, empatiche e solidarie cui anzians fragjii e cu lis lôr fameis», a sclarissin i organizadôrs. «Propit par stimolâ une esperience concrete di ce che a vivin ogni dì lis personis che a patissin di degrât cognitîf, vie pal event i partecipants a podaran sperimentâ in maniere direte il “vivi” la dispercezion, acompagnâts di professioniscj che ju judaran a elaborâ la esperience», a precisin i promotôrs.
Par partecipâ ae cunvigne si à di notâsi dentri di domenie ai 14 di Mai dal 2023 midiant dal leam chi sot o dal codiç QR che si cjate te locandine in zonte.
A podaran jessi acetadis al massim 85 personis: a domande, al vignarà dât un atestât di partecipazion.
Par informazions:
Mariaelena Brovedan, Itaca Cooperativa Sociale Onlus - 3460670514
Daniela De Narda, Aree “Adulti-Anziani” dal Servizi sociâl dai Comuns - 0432989542