Lis demencis: sintoms, manifestazions e strategjiis di intervent
lunis 22 di Zenâr dal 2024
Cunvigne a Vile di Cjargne sabide ai 27 di Zenâr par cure dal Servizi Sociâl dai Comuns de Cjargne
Il Servizi Sociâl dai Comuns dal Ambit Teritoriâl de Cjargne adun cu la Cooperative Sociâl Itaca e in colaborazion cu la Aministrazion comunâl e la Parochie di Vile di Cjargne a inmanein la cunvigne sul teme “Lis demencis: sintoms, manifestazions e strategjiis di intervent” par sabide ai 27 di Zenâr aes 8.30 li de sale “Don Luigi Fior” di Vile di Cjargne (dongje de sede de Parochie).
Il decjadiment cognitîf e lis malatiis che a puartin ae demence a son simpri plui slargjadis intune popolazion che e je daûr a deventâ ancjemò plui anziane.
Vie pai ultins agns i servizis sociosanitaris teritoriâi a àn regjistrât numerosis domandis de bande di familiârs e di badantis su la necessitât di lâ insot te maniere che lis patologjiis a vegnin fûr, sul lôr decors, ma soredut su lis strategjiis pratichis e operativis plui zovevulis par frontâ chestis problematichis, e ancje sui servizis di podê inviâ.
Dopo dai salûts des istituzions, te cunvigne a cjaparan la peraule la dotore Gabriella Bellini, miedi di gjeriatrie, e la dotore Laura D’Ospina, psicolighe psicoterapeute, che a esaminaran i sintoms cognitîfs e lis manifestazions des demencis cun cualchi note su lis terapiis farmacologjichis. La dotore Sabrina Degano, terapiste ocupazionâl, e fevelarà invezit des terapiis no farmacologjichis.
Cun di plui, al vignarà dât spazi a cualchi testemoneance di familiârs.
Tal dopomisdì di vinars ai 26 di Zenâr e te matine dai 27, i partecipants a varan la pussibilitât di visitâ la “stanzie de dispercezion”, che e sarà preparade dongje de Sale Don Luigi Fior e che e permetarà di fâ vivi, a cui che lu volarà, une esperience di percezion une vore simile di chê vivude des personis cun demence, cul supuart di personâl cualificât.
Par cjapâ part ae cunvigne si à di notâsi dentri di joibe ai 25 di Zenâr dal 2024 fracant sul link o pûr incuadrant il codiç QR che al è tal program da pît de pagjine.
L’event al è increditât pe formazion continue dai Assistents Sociâi.
Par plui informazions:
Cooperative Sociâl Itaca – 346 0670514
Servizi sociâl dai Comuns – 0433 462457