Dâ vôs: lengaçs e struments di condivision par cressi i nestris fîs
joibe 16 di Març dal 2023
A Sudri, schirie di incuintris cu la colaborazion dal Servizi Sociâl dai Comuns de Cjargne
Il Servizi Sociâl dai Comuns dal ambit teritoriâl de Cjargne, midiant de
colaborazion preziose dal Comun di Sudri e de Pro Loco di Sudri, e al contribût di diviersis mamis che a fasin part de APS Spazio Famiglia e de Parochie di Sudri, al propon, tai mês di Març e di Avrîl dal 2023, trê seradis dedicadis ai gjenitôrs dal titul “Dare Voce - Linguaggi e strumenti di condivisione per crescere con i nostri figli.”
Tropis voltis capitial di dî: “No sai cemût fevelâ cun gno fi di un ciert argoment”, “Cemût puedio sclarî a mê fie cheste robe?”, “Trop varessio di intervignî intes barufis di gno fi?”: a son chestis, e tantis altris, lis domandis che si fasin i gjenitôrs, che no cjatin simpri une rispueste adate, pe cuâl a son dispès incierts e preocupâts.
Tacant de scolte di chestis domandis dai gjenitôrs a son stâts struturâts chescj trê incuintris, cul obietîf di proponi aes maris e ai paris plui struments par fevelâ cui fîs; tal stes timp, i trê events a ufrissin un spazi di condivision e di riflession dulà che la esperience dai gjenitôrs e je la protagoniste.
Te prime serade, midiant de leture di doi cuaders ilustrâts, si fevelarà di LEAMS: dai leams che a nassin in maniere naturâl intune famee e che tal timp, cemût che al è just, si modifichin par favorî une autonomie dai fîs simpri plui grande.
Te seconde serade si proponaran senis di un cine par permeti il confront e la riflession sul teme dal CONFLIT: in particolâr, si fevelarà di cuâl che al sedi il rûl plui costrutîf e educatîf dal adult intai conflits dai fîs
Te ultime serade, infin, midiant di seriis TV si frontarà il teme dal CAMBIAMENT: in particolâr, cemût che il gjenitôr si pon te cressite dai siei fîs, par no vê di continuâ a tratâ un preadolessent, o un adolessent, tant che un frut di 7 agns, o pûr un frut de scuele de infanzie tant che un fantaçut di 11 agns.
Cuaders ilustrâts, cines e seriis TV a son ducj struments che a àn un lengaç propri, che a puedin permeti di comunicâ in mût plui zovevul cun fruts e fantats, individuant il canâl plui just par ognidun di lôr.
I incuintris si fasaran te Sale Kaiser Zoncolan, in Vie Val Calda a Sudri, tes zornadis di joibe ai 16 e ai 30 di Març e ai 13 di Avrîl dal 2023 des 18.00 aes 20.00. A saran condusûts de educadore dal Servizi Sociâl dai Comuns de Cjargne, Nicole Straulino, e de psicolighe di comunitât dal Servizi Sociâl dai Comuns de Cjargne, Giulia Sillani, operadore de Cooperative Itache.
Par informazions e iscrizions si à di contatâ Nicole Straulino:
WhatsApp 331.2674511; mail: nicole.straulino@asufc.sanita.fvg.it
