La Crôs Rosse Taliane e regale une scune pe cure dal neonât ae Pediatrie di Tisane
miercus 12 di Fevrâr dal 2025
Martars ai 28 di Zenâr, te Pediatrie dal Ospedâl di Tisane, si è tignude une cerimonie curte par une gnove impuartante donazion ae Struture: in graciis de Crôs Rosse Taliane unitât teritoriâl di Tisane Comitât di Udin, la Pediatrie e podarà di fat contâ suntune scune moderne e acessoriade che e permetarà ae mame di cjapâsi cure dal frutin a pene nassût in maniere plui comude e sigure.
Cheste scune speciâl e je dissegnade di pueste par garantî un co-sleeping, o sedi par durmî in bande de mame in sigurece totâl e, tal câs che al coventi, pal traspuart dal frutin: e je ancje tant utile pal rooming-in, che al previôt che mame e frutin, subit dopo dal part, a stedin insiemi inte stesse cjamare 24 oris su 24.
Durmî in bande dal propri frut al è impuartant parcè che al jude a inviâ il latament al sen e a creâ il leam materni, di là dal fat che la mame e pues rispuindi ai bisugns dal piçul.
La scune speciâl e sormonte il jet de mame che cussì no je obleade a alçâsi par cjapâ sù il frut: chest al è un grant vantaç soredut se si à vût un travai lunc o un tai cesari. Cun di plui, si pues manovrâle cun facilitât e traspuartâ il frutin in plene sigurece, par esempli de stanzie fin al Nît.
Ae cerimonie al jere presint personâl de Crôs Rosse Taliane, tra chei il president dal Comitât di Udin Cerruti Cristina, associazions e grups dal teritori (Ordin dal Golâr di Sant’Agata dei Paternò, Grup Amîs di Roncjis pe solidarietât, Che da la Foghera di Tisanote) e il personâl de Pediatrie e Gjinecologjie di Tisane.
La diretore de Pediatrie, dotore Elisabete Miorin: “Cheste cerimonie e je une ocasion par ringraciâ une vore la Crôs Rosse Taliane par vê pensât al nestri repart cun cheste gjenerose e utile donazion. Cun di plui, o vûl pandi a non dal grup de Pediatrie il nestri grant preseament par ducj i volontaris de CRI che aromai za di agns a sostegnin il nestri repart cun costance e concretece, donant timp preziôs ae assistence des fantatis ricoveradis par disturps dal compuartament alimentâr, permetint ai gjenitôrs di cjapâsi une polse, fasint dut cun grant impegn e sensibilitât”.