Cressi in dì di vuê: coordenadis par un cjaminâ educatîf cui zovins

Ce vuelial dî cressi pai zovins di vuê? Cualis sono lis sfidis educativis prioritariis? Si puedino vê leams di coresponsabilitât sul teritori? Cun chestis domandis a tacaran i trê incuintris par adults "Cressi in dì di vuê: coordenadis par un cjaminâ educatîf cui zovins" promovûts de Rêt teritoriâl "B*sogno d'esserci", che dal 2011 e je impegnade inte promozion di ativitâts e di progjets par fruts, fantats, zovins e pes lôr fameis.

Gjenitôrs, insegnants, operadôrs, aministradôrs e volontaris a podaran rifleti insiemi e cjapâ sù gnovis cognossincis su cualchi teme di fonde dal lavôr educatîf cui zovins. L'intindiment dai incuintris, che a saran par cure di Franco Santamaria, pedagogjist, espert di politichis pai zovins e za docent universitari, al è di promovi il scambi di esperiencis tra cui che al lavore cu lis gjenerazions zovinis.

Ducj i apontaments a saran a Glemone, te Sale de Comunitât di Mont dal Glemonàs, che e poie la iniziative dant a gratis lis sôs salis. I incuintris di vinars ai 6 e ai 13 di Otubar si davuelzaran des 18:00 aes 20:00. A son tantis lis domandis che su chês si disviluparà l'intervent dal relatôr: cualis sono lis domandis dai zovins, lis lôr dificoltâts e potenzialitâts? Ce ise la relazion educative? Cuâl isal il rûl e cualis sono lis responsabilitâts dai adults e de comunitât locâl? Ducj i doi i apontaments si sieraran cuntun ghiringhel par che al sedi un scambi tra i partecipants.

Tal incuintri di sabide ai 18 di Novembar (des 15:00 aes 19:00) grups di lavôr a permetaran ai partecipants di confrontâsi sul teme dai leams di coresponsabilitât sul teritori e su lis prospetivis di un impegn comun a pro dai fantats e dai zovins. Lis conclusions a saran par cure dal pedagogjist Franco Santamaria.

Par partecipâ al percors si à di dâ une conferme di partecipazion scrivint une e-mail ae direzion di pueste eletroniche info@bsognodesserci.it dentri di miercus ai 4 di Otubar dal 2023.