ASUFC e organize cors pe cualifiche di Operadôr Sociosanitari: disponibii 25 puescj
lunis 30 di Otubar dal 2023
Scjadince des iscrizions: ai 20 di Novembar
Daûr des disposizions dal mandât regjonâl di inviâ percors di formazion intal ambit dai servizis sociosanitaris e socioassistenziâi, ASUFC e inmanee cors par Operadôrs Sociosanitaris (OSS) di destinâ al sisteme di assistence dal Friûl-Vignesie Julie.
L’OSS al è la figure professionâl che e davuelç ativitâts tal cjamp sanitari e sociâl par sodisfâ lis dibisugnis primariis de persone e favorî il so benstâ e la sô autonomie; al pues vê funzions di operadôr tecnic assistenziâl, di assistence di base, di ausiliari socioassistenziâl e di assistence a domicili.
I puescj disponibii a son 25 e lis domandis di iscrizion a àn di jessi mandadis dentri dai 20 di Novembar dal 2023.
Il cors al è gratuit, si tignarà di Dicembar dal 2023 a Setembar dal 2024 inte sede di vie Chiusaforte, 2 a Udin e al previôt une durade di 1.000 oris dividudis in cheste maniere: 534 di teorie, 450 di tirocini, 16 pal esam.
Par partecipâ, a coventin chescj recuisîts:
- Vê il diplome di scuele dal oblic (tierce medie), o ben vê il proviodiment di ecuivalence dal titul otignût tal forest;
- Vê finît disevot agns di etât tal dì de iscrizion ae selezion di amission al cors;
- Residence tal teritori regjonâl.
I arlêfs di nazionalitât foreste a àn di dimostrâ une cognossince de lenghe taliane che e sedi almancul di nivel B1. Se no àn za une certificazion, il nivel di cognossince al sarà verificât cuntune prove di amission di pueste.
Ae fin dal cors e dopo vê passât l’esam, al ven dât un atestât di cualifiche professionâl di “OPERADÔR SOCIOSANITARI”, che al corispuint al nivel 3 EQF (European Qualification Framework): cui che al otignarà l’atestât, al podarà partecipâ ai concors bandîts dai Ents dal Sisteme Sanitari Regjonâl.
Il diretôr gjenerâl, dotôr Denis Caporale: “O metìn a disposizion lis figuris professionâls e lis lôr competencis par formâ in maniere direte i operadôrs che tal avignî a saran impegnâts tes struturis di assistence di ASUFC e no dome. Lis primis edizions dai mês passâts a son stadis positivis, o sin fiduciôs che o rivarìn a replicâ la esperience furnint ai partecipants un valit percors formatîf”.
Il bant e la domande di partecipazion si puedin discjamâ tal leam chi sot.