Cors par molâ di fumâ: viertis lis iscrizions
lunis 8 di Zenâr dal 2024
Il percors di grup al previôt dîs incuintris serâi
Ducj a san che il fum dal spagnolet al è tra i fatôrs di pericul principâi tal mont pal svilup de plui part des malatiis cronichis no trasmissibilis: si calcole che in Italie almancul 1 persone su 4 e fumi in maniere abituâl.
Il centri di Prevenzion e Tratament dal Tabagjisim di Udin al inmanee percors par molâ di fumâ cun chê di judâ lis personis a interompi cheste consuetudin cence fadie e soredut a mantignî la astinence tal timp.
A son viertis lis iscrizions ai prossims cors par “molâ di fumâ” che si davuelzaran in 10 incuintris serâi, des 19.30 aes 21.30, dividûts su trê setemanis, te sede dal Dipartiment des Dipendencis in vie Puçui, 330 a Udin.
La prossime edizion di Zenâr/Fevrâr e sta par tacâ: par frecuentâ il cors, che al à un numar limitât di partecipants, si à di paiâ un ticket di 36 euros.
Par notâsi e par vê plui informazions:
0432 806635 o 806649 (des 9.00 aes 17.00 di lunis a vinars)