Il Dipartiment Chirurgjic di ASUFC al è protagonist dal 36m Congrès di Chirurgjie sul Aparât Digjerent
Ancje chest an, lant daûr de tradizion, ai 27 e 28 di Novembar si è tignût a Rome il 36m Congrès di Chirurgjie dal Aparât Digjerent di chirurgjie live, cognossût ancje come "il Palazzini".
L'edizion dal an passât, dute online, e à vût un sucès straordenari: plui di 210.000 partecipants di dut il mont (4.550 de Italie) e passe 1.060.000 visitis aes pagjinis dal sît web.
Il program dal 2025 al à ufiert plui di 150 intervents di chirurgjie in direte dai centris di ecelence di dut il mont, cun passe 500 oris di live surgery, dedicadis a dutis lis patologjiis dal aparât digjerent e a areis di interès urologjic, endocrinochirurgjic, gjinecologjic, ortopedic.
Ancje il Dipartiment Chirurgjic dal Presidi Ospedalîr Sante Marie de Misericordie di Udin al à fat la sô part in chest contest prestigjôs, cu lis chirurgjiis in direte des salis operatoriis dal Dipartiment.
La ASUFC e je simpri stade protagoniste al "Palazzini", mostrant la sô vision pe inovazion tecnologjiche e pe chirurgjie miniinvasive. La chirurgjie robotiche si le dopre simpri di plui e chest an, pe prime volte, ducj i intervents chirurgjics trasmetûts dal Sante Marie de Misericordie a son stâts fats cu la tecniche robotiche.
Cheste tecnologjie aromai e je jentrade in maniere impuartante te pratiche cliniche de plui part des dissiplinis chirurgjichis par chel che al tocje la chirurgjie adominâl e toraciche. Ancje pal distret cjâf cuel e pe chirurgjie senologjiche si tache in maniere progressive a doprâ cheste tecniche.
L'ambit urologjic e di chirurgjie gjenerâl a son pal moment chei cui numars plui alts: di fat, ai 28 di Novembar a son stâts realizâts 3 intervents robotics: une nefroureterectomie de bande de equipe de Cliniche Urologjiche, une emicolectomie diestre de bande de equipe de Cliniche Chirurgjiche e une retopessi de bande de equipe di Chirurgjie Gjenerâl.
Il supuart dal personâl anestesiologjic e infermieristic al è stât fondamentâl, e compagn chel dai tecnics video, intune zornade une vore impegnative li che la dificoltât e je stade inmò plui grande par vie dal siopar gjenerâl.
Il Diretôr de Cliniche di Chirurgjie, Giovanni Terrosu: "La organizazion di chestis zornadis e je simpri complesse e al è dome graciis al impegn di ducj che si rivin a otignî i risultâts. O ringracii in maniere particolâr ducj i miedis e i infermîrs pal lôr contribût determinant te zornade di vinars, cun dut dal siopar gjenerâl".
Il diretôr dal Dipartiment di Chirurgjie, Alessandro Crestani: "La partecipazion costante di ASUFC, tai ultins agns, al "Palazzini" e conferme la alte cualitât de ufierte chirurgjiche e il percors di inovazion tecnologjiche costant".
Il Diretôr sanitari di ASUFC, David Turello: "La presince consolidade di ASUFC in chest event prestigjôs e je un ricognossiment des nestris specialitâts chirurgjichis tal panorame nazionâl. O ringracii une vore ducj i nestris operadôrs che cuntune competence ricognossude a sigurin i percors chirurgjics di ASUFC a pro di ducj i pazients".