Anzians atîfs tai Comuns de Culinâr: centris di agregazion, teatri e tante voie di stâ in compagnie
joibe 29 di Jugn dal 2023
Dal 2019 il Servizi Sociâl dai Comuns dal Ambit Teritoriâl Culinâr, adun cu lis associazions dal teritori Mo.V.I. e ANTEAS, al promôf la realizazion di politichis di invecjament atîf e turisim sociâl pai citadins residents intai 14 Comuns dal Ambit (Buie, Colorêt di Montalban, Cosean, Dignan, Feagne, Forgjarie, Maian, Murùs, Rivis Darcjan, San Denêl, San Vît di Feagne e Trep Grant).
"L'invecjament atîf - e comente la responsabile dal servizi Elisa Vidotti - tal 2002 al è stât definît de Organizazion Mondiâl de Sanitât tant che "il procès di otimizazion des oportunitâts di salût, di partecipazion e di sigurece par miorâ la cualitât de vite des personis che a deventin vielis".
Di fat, tancj studis internazionâi a testemonein il leam positîf che al è tra il divignî vielis in maniere ative e i beneficis su la salût fisiche e psicologjiche, cence escludi la percezion di vê plui cualitât e sodisfazion de vite. "Invecjament atîf" al vûl dî jessi atîfs, o ativâsi, in maniere formâl o informâl intun o in plui aspiets de vite sociâl (volontariât, relazions sociâls, educazion permanente, fâ i nonos, e v.i.) o ancje privade (ativitât dal timp libar, passetimp, turisim, e simii), sielzint in libertât la ativitât o lis ativitâts dulà impegnâsi, daûr des propriis aspirazions e motivazions.
Cun cheste logjiche, in chescj ultins agns si son fatis cetantis iniziativis che, magari cussì no, a àn ralentât tal periodi dal Covid; te Sierade dal 2022 a àn tornât a cjapâ pît, tacant de gnove viertidure des ativitâts dai Centris di Agregazion.
Cumò a son atîfs sul teritori chescj Centris: Madrîs di Feagne, cul grup “Cjalìnsi in muse” (miercus dopomisdì des 15:00 aes 18:00); San Denêl, cul grup “Insiemi al è miôr” (miercus dopomisdì des 15:00 aes 17:00), Colorêt di Montalban (miercus dopomisdì des 14:30 aes 16:30), Flaiban (miercus dopomisdì des 15:00 aes 17:00), Trep Grant cul grup “Il Girasole” (martars dopomisdì des 14:30 aes 16:30) e Sant Vît di Feagne (martars dopomisdì des 15:00 aes 17:30).
In ogni Centri di Agregazion si fasin ativitâts diferentis, tra chês plui frecuentis: il zûc de tombule, i cjants di grup, la leture di contis, ativitâts creativis manuâls; in plui, ogni mês in ducj i centris, si propon la gjinastiche dolce sot de direzion di une fitoterapiste.
Cun di plui e je stade ativade une ativitât paralele tra plui centris di laboratori teatrâl cul supuart e la regjie di Dino Persello, regjist teatrâl innomenât, apassionât di Marilenghe. Il prin Spetacul Teatrâl, “ARMÂRS DI PÂS”, si fasarà ai 25 di Jugn dal 2023 aes 18:00, tal centri SOT DAL MORÂR logât in vie Maggiore 83, a Madrîs di Feagne. La partecipazion dai citadins aes ativitâts dai centris e je libare e gratuite.
De Vierte dal 2023 si pues tornâ a partecipâ aes vacancis pai anzians: il prin turni al è za stât, tes termis di Abano Terme dai 28 di Mai ai 10 di Jugn dal 2023. Il secont turni al sarà par lâ a Lignan, dai 4 ai 11 di Setembar dal 2023.
Tal Istât dal 2023 si fasaran ancje gjitis di une zornade inmaneadis dai centris di agregazion che a saran par ducj i anzians autosuficients residents tai comuns de Culinâr. Il program des gjitis al è chest:
- ai 29 di Jugn dal 2023: si larà a Grau e a Barbane cun visite dal santuari: si à di prenotâsi dentri di vinars ai 23 di Jugn;
- ai 27 di Lui dal 2023: Grotis di Postumie (visite dentri cul trenin);
- ai 21 di Setembar dal 2023: visite a Aquilee (Basiliche, batisteri e rescj romans).
Pes personis interessadis a partecipâ aes diviersis ativitâts proponudis, o par vê dutis lis informazions, si pues contatâ il Movimento di Volontariato Italiano (Mo.V.I.) di San Denêl al 0432- 1451545 (cjase dal Volontariât). – segreteria@movi.fvg.it .
