La ecelence de gnove tecniche vNOTES pe Cliniche Ostetriche-Gjinecologjiche di Udin
miercus 22 di Novembar dal 2023
Tai dîs passâts, li dal Centri di Simulazion e Alte Formazion dal Ospedâl Sante Marie de Misericordie, al è stât inmaneât un cors su la tecniche vNOTES tignût dal Professôr Tommaso Simoncini (Diretôr UOC Gjinecologjie e Ostetricie Universitarie I di Pise e in plui ancje diretôr de scuele di Specializazion in Gjinecologjie e Ostetricie de Universitât di Pise) che al è stât daûr a plui di 200 câs vNOTES, judât dal professôr Paolo Mannella (professôr associât Gjinecologjie e Ostetricie te Universitât di Pise).
La vNOTES (vaginal Natural Orifice Transluminal Endoscopic Surgery) e je une tecniche chirurgjiche emergjente tal cjamp gjinecologjic che e permet la jentrade inte cavitât peritoneâl traviers de vagjine midiant di une strumentazion laparoscopiche standard.
Cheste tecniche di acès tal adom e permet di fâ une vore di proceduris di esecuzion comune in gjinecologjie, tra chestis la isterectomie par patologjie buine e par cualchi indicazion oncologjiche, la chirugjie di altris parts dal cuarp interessadis (anessiectomie, asportazion di vissiis o formazions ovarichis, salpingjectomie) e altris patologjiis.
La SOC di Ostetricie e Gjinecologjie di Udin, simpri indevant tal adotâ tecnichis e tecnologjie gnovis, e à adotât la vNOTES par ufrî aes pazientis la miôr e plui gnove soluzion chirurgjiche.
I esperts a àn ilustrât prin di dut i beneficis de tecniche (supuartâts di numerôs studis clinics), come par esempli la mancjance di cicatrîs sul adom cuntun grant vantaç estetic pes pazientis, la riduzion dal dolôr dopo de operazion cun consecuente riduzion dal ûs di analgjesics, la pussibilitât di dimission il dì stes dal intervent e la velocitât di esecuzion de procedure, e a àn metût a disposizion la lôr esperience spiegant ai arlêfs, midiant dal jutori di simuladôrs e di modei anatomics dedicâts, ducj i pas de procedure de tecniche.