La Chirurgjie Vascolâr e la Radiologjie Interventistiche dal Ospedâl di Udin a àn un ricognossiment a nivel european

Il diretôr de Chirurgjie Vascolâr, dotôr Pauli Frigatti, e il Diretôr de Radiologjie Interventistiche, dotôr Massimo Sponza, a àn vût un ricognossiment impuartant de bande di Artivion EMEA pal disvilup de Chirurgjie Miniinvasive Endovascolâr intal tratament des patologjiis complessis de aorte toraciche adominâl (aneurismis, dissezions).

E je une chirurgjie une vore complesse che e oblee a intervignî su dutis lis arteriis vitâls che a nassin de aorte toraciche adominâl (renâls, intestinâls, epatichis).

Timp indaûr, chest tratament al jere pussibil dome cuntune tecniche chirurgjiche vierte e duncje cun nivei di mortalitât avonde alts; vuê, midiant dal disvilup di chestis tecnichis gnovis, si ben che a restin ancjemò pardabon complessis, si rive a completâlu in maniere tant mancul invasive e cuntune mortalitât une vore ridusude.

Par chest stes motîf, sedi in Italie che a nivel european, chestis metodichis a son puartadis indenant e realizadis, in ogni câs, dome di un numar selezionât di centris specializâts.

Pe ativitât des dôs struturis al è un ricognossiment impuartant, come che al testemonee propit il dotôr Frigatti: "Si trate pardabon di une grande sodisfazion, stant che al è la espression dal nivel di competence e de capacitât colaborative che o vin inte nestre struture (in chest sens, si à di cjapâ dentri la colaborazion cun reparts tant che la Cardiochirurgjie e il Dipartiment di Anestesie e Rianimazion de ASUFC), ma ancje dal sfuarç di standardizâ lis proceduris e di analizâ cun serietât i risultâts par restâ dentri de Evidence Sientifiche.

Si à di calcolâ – al va indenant Frigatti – che Udin, intal grup dai ospedâi europeans che a partecipin a chest regjistri, par nivel di esperience al è al 5^t puest, subit daûr des Universitâts di Münster e di Heidelberg in Gjermanie.

O sperìn di podê mantignî cheste valutazion ancje tal avignî, jemplant il disvantaç tecnologjic che ancjemò nus ten lontans di chei altris centris: chest, par no dispierdi il patrimoni acuisît di esperience e cognossincis, soredut dai miedis plui zovins che a lavorin intes nestris struturis dedicantsi cun passion a chescj progjets, contribuint in maniere sostanziâl a otignî risultâts di chest nivel".