Distret sociosanitari dal Friûl di Mieç (Codroip): cessazion miedi di medisine gjenerâl dot. Saremi
Dai 19 di Lui
La Direzion dal Distret sociosanitari dal Friûl di Mieç e vise che il dot. Saremi Namin Pakrooz al finìs di lavorâ tant che miedi di medisine gjenerâl tal stes ambit teritoriâl ai 19 di Lui dal 2026 (ultime dì di lavôr ai 18/07/2026), parcè che al è rivât al limit di etât fissat dal Art. 12 quater, come 1, dal D.L. n. 25/2025 convertît de L. n. 69/2025.
Stant che no si pues assegnâ di ufici un gnûf miedi di medisine gjenerâl, si invidin i pazients dal dot. Saremi a sielzi un miedi di fiducie tra chei che a lavorin tal ambit teritoriâl dal Distret dal Friûl di Mieç (Comuns: Basilian, Bertiûl, Cjamin dal Tiliment, Cjasteons di Strade, Codroip, Listize, Merêt di Tombe, Mortean, Sedean, Talmassons, Vildivar), o ben tai ambits dongje che a vedin puescj a disposizion.
La sielte si podarà fâle cu lis modalitâts solitis:
- jentrant sul Portâl SESAMO midiant dal Sisteme Public di Identitât Digjitâl (SPID), de Cjarte di Identitât eletroniche (CIE) o de Cjarte regjonâl/nazionâl dai servizis (CRS o CNS)
- par pueste eletroniche aes direzions:
- sanitaria1.dist.codr@asufc.sanita.fvg.it
- cambiomedicocodroipo@asufc.sanita.fvg.it
scrivint la preference pal miedi e metint in zonte la tessare sanitarie di cjarte e un document di identitât valit. Si intint che cheste opzion e podarà subî modifichis tal câs che il miedi segnât nol ves plui di jessi disponibil.
Si precise che lis domandis rivadis par pueste eletroniche a ricevaran une rispueste in ordin cronologjic daûr di cuant che a son rivadis, tal zîr di 4/5 dîs di vore, se i sportei a son vierts al public. Dome la sielte fate di persone tal sportel o midiant di SESAMO e garantìs che il miedi al sedi assegnât daurman.
- di persone – puartant cun se la letare inviade a cjase, la tessare sanitarie di cjarte e un document di identitât valit – tal Sportel de Anagrafe Sanitarie li de "Cjase de Comunitât" HUB di Codroip, al prin plan (ex RSA) dal edifici sede dal Distret Sociosanitari in viâl Duodo n. 82, in chescj oraris e cjapant apontament:
- lunis des 9.00 aes 13.00
- martars des 14.00 aes 17.00
- miercus des 9.00 aes 13.00
- joibe des 9.00 aes 11.00
- vinars des 9.00 aes 11.00
Se i puescj disponibii tra i miedis dal Ambit teritoriâl dal Distret dal Friûl di Mieç o di chei dongje no fossin avonde, si vise che la Aziende e garantìs in ducj i câs la assistence sanitarie ai pazients cence miedi di fiducie midiant dal Ambulatori Distretuâl di Assistence Primarie, che al è te sede dai Poliambulatoris distretuâi (a Codroip in viâl Veneto, 33), in vore dal mês di Zenâr e gjestît de dotore Passerino Noelia.
Si pues jentrâ tal Ambulatori dome cjapant apontament clamant il numar 335/7991197 di lunis a vinars des 9:00 aes 12:30. Il Miedi presint tal Ambulatori, che nol pues jessi assegnât, al fasarà lis visitis in ambulatori, e, se al covente, a domicili, lis certificazions, lis prescrizions di visitis specialistichis e di medisinis.
Si consee di clamâ la Anagrafe Sanitarie al numar 0432 1910165 dal lunis al vinars des 9.00 aes 12.30 par ducj i sclariments e par fissâ un apontament di mût di no stâ a spietâ dibant tai sportei.