Centri Traplants F-VJ: doprade pe prime volte in Regjon la machine pe conservazion artificiâl dal fiât

Ai 8 di Novembar dal 2022 e je stade doprade, pe prime volte in Regjon, tal Centri Traplants di fiât de ASU FC, la machine par conservâ il fiât in maniere artificiâl, par garantî al orghin une conservazion otimâl intant che si spiete di traplantâlu intun pazient: il machinari al è stât doprât dal grup di lavôr direzût dal professôr Andrea Risaliti, a pene tornât de esperience fate intal Centri Traplants di Dubai.

I timps di ischemie dai orghins di traplantâ a son critics par che il traplant al ledi a bon fin e a àn di jessi plui curts che si pues; dut câs, a son situazions logjistichis incompatibilis cun chest assiome fondamentâl de sience dai traplants, in particolâr cuant che i orghins a vegnin di altris bandis de Italie, situazion che, par esempli, e je plui dificile pal Friûl-Vignesie Julie, jessint une regjon periferiche.

In chest câs specific, il fiât al è stât traplantât intune paziente che e veve une insuficience epatiche fuarte e grave, tant di domandâ un traplant in “urgjence nazionâl” e duncje l'ûs dal prin orghin compatibil sul teritori talian che al è stât cjatât fûr avonde lontan di Udin.

Pe prime volte intal Centri Traplants di Fiât de nestre Regjon, la disponibilitât de machine di conservazion artificiâl di chest orghin e à permetût di doprâ cun sucès un fiât fin al so traplant, fat plui di 12 oris dopo che al jere stât prelevât.

La tecnologjie de machine di conservazion dal fiât, che si è disvilupade intai ultins agns, in futûr e varà la potenzialitât di incressi la disponibilitât di orghins di traplantâ: chest al è fondamentâl par fâ front ae domande simpri plui alte di pazients in liste di spiete, garantint no dome plui traplants, ma ancje un miorament potenziâl dai risultâts dal traplant stes.

Il dotôr Baccarani dal Centri Traplants di fiât al à marcât: “Al è un strument che al permet di miorâ la ativitât dai traplants in dute la nestre Regjon, garantint un sprolungjament dal stât di conservazion dal orghin e duncje une planificazion ancjemò plui eficiente dai intervents: pai specialiscj e pai pazients stes al è pardabon un pas une vore impuartant”.