Centri Regjonâl Traplants F-VJ: 8 intervents in 30 oris
miercus 1 di Març dal 2023
Intai dîs passâts tal Ospedâl Sante Marie de Misericordie di Udin a son stâts puartâts insom doi procès di donazion in contemporanie e une donazion di rognon di vivent: a son stâts fats in 30 oris, un timp straordenari tignût cont che il tripli prelêf al à cjapât dentri ancje doi grups di fûr regjon, un traplant di cûr, un di fiât, il prelêf di vivent e trê traplants di rognon in sede, cence contâ i traplants fats fûr regjon.
I traplants a son stâts fats su pazients cuntune insuficience di orghin terminâl, cundizion là che la uniche pussibilitât di cure e jere chê dal traplant.
Si à rivât a puartâ a bon fin cheste ativitât straordenarie prin di dut graciis ae disponibilitât e ae solidarietât des fameis dai donadôrs, ae professionalitât dal personâl dai reparts di Anestesie e Rianimazion e ai grups chirurgjichis de Cliniche Chirurgjiche, impegnade intal stes timp in plui salis operatoriis e Cardiochirurgjie. Inte stesse maniere, e je stade fondamentâl la colaborazion strente de Nefrologjie e dal Grup dai blocs operatoris, de Neurologjie, de Direzion Mediche, de Epatologjie e dai tancj Specialiscj impegnâts intai procès delicâts di prelêf e di traplant, coordenâts dal Centri regjonâl traplants.
Ancje la colaborazion de Centrâl Operative SORES, de CRI e dal 2nt Scjap de Aeronautiche Militâr di Rivolt e je stade essenziâl, cun chest ultin che al à permetût che l’avion al rivàs cul grup di miedis e che al tornàs a partî cul don preziôs.
Cheste ativitât, concentrade intal timp, e jentre intai 26 traplants fats dal principi dal an (4 di fiât, 5 di cûr e 17 di rognon, 2 di chescj za di vivent) par un totâl di passe 2.720 traplants di cuant che e je tacade la ativitât.
Il dotôr Roberto Peressutti, diretôr dal Centri Traplants: “E je stade une operazion pardabon ecezionâl pal coordenament di dutis lis componentis, sedi pal timp passât, une vore curt, sedi pe complessitât des operazions: chest al testemonee la alte professionalitât dai specialiscj che a operin tal teritori dal F-VJ e no dome”.