Cjase de Comunitât: la presentazion dai servizis e l'inviament des primis trê a Cividât, Glemone e Udin

Lunis prin di Dicembar a àn scomençade la lôr ativitât lis primis trê Cjasis de Comunitât di ASUFC: un pas impuartant pal sisteme sanitari regjonâl par meti in vore un model organizatîf gnûf cuntun rûl centrâl dai servizis teritoriâi.

Te Cjase de Comunitât: miedis, infermîrs di comunitât, riabilitadôrs, assistents sociâi, psicolics, personâl aministratîf e altris operadôrs sanitaris che a operin in maniere integrade e multiprofessionâl, organizant un lûc dulà che il citadin al podarà cjatâ une rispueste ai bisugns sanitaris no urgjents, ai bisugns sociosanitaris e ancje acedi ai servizis aministratîfs.

In plui, un rûl centrâl al ven assegnât aes Associazions, che, in colaborazion cui operadôrs, a contribuiran al benstâ di ogni citadin e de comunitât stesse.

Lis Cjasis de Comunitât principâls (HUB) a son in program a Cividât, Codroip, Glemone, Tisane, Palme, San Denêl, Tarcint, Tarvis, Tumieç e Udin. Tra chestis, lis primis che a son stadis inviadis il prin di Dicembar, a son a Cividât, Glemone e Udin.

Dongje di chestis si zontaran altris 4 Cjasis de Comunitât periferichis (SPOKE) tes localitâts di Çarvignan, Manzan, Tavagnà e Çuian.

Intal specific, te Cjase de Comunitât un citadin al podarà cjatâ chescj servizis:

• Pont Unic di Acès (PUA), dulà che si podaran vê dutis lis informazions e lis indicazions leadis ai servizis ufierts: un vêr e pont di acet par orientâ l'utent inte maniere miôr.
• Assistence domiciliâr: il Servizi Infermieristic Domiciliâr (SID) e il Servizi Riabilitatîf Domiciliâr (SRD) a furnissin intervents a domicili su la fonde di programs terapeutics assistenziâi e/o riabilitatîfs personalizâts definîts in colaborazion cui MMG (miedis di medisine gjenerâl), i PLS (pediatris di libare sielte) e i specialiscj di setôr. In cheste maniere si rive a stâ daûr dai pazients in maniere integrade e multiprofessionâl
• Infermîr di comunitât, tant che pont di riferiment pai bisugns sanitaris
• Ambulatori curis primariis, dulà che un miedi (24 h/dì) e un infermîr (12 h/dì) a sigurin une rispueste ai bisugns sanitaris dal citadin tai dîs di vore e di fieste, di dì e di gnot
• Ambulatori des cronicitâts, dedicât ai pazients che a patissin di patologjiis cronichis (diabete, insuficience cardiache, BPCO, demencis, patologjiis degjenerativis e oncologjichis)
• Pont Prelêfs
• Specialistiche ambulatoriâl pe cronicitât: ambulatori cun specialiscj che a furnissin prestazions di valutazion, diagnosi e cure di prin ingrès, follow up e control pe gjestion dai pazients cronics che a puedin zovâsi ancje di servizis di telemedisine
• Centri Unic di Prenotazion (CUP)
• Ufici Anagrafe Sanitarie, pes pratichis aministrativis peadis ae tessare sanitarie, la sielte o la revoche dal miedi di medisine gjenerâl, esenzions ticket e altre documentazion
• Ufici Assistence Protesiche (UAP), par domandâ informazions e otignî lis autorizazions pe furnidure di jutoris, protesis e ortesis, e par otignî la autorizazion par davuelzi programs di assistence riabilitative ufierts in modalitât di convenzion