Progjet SOS Ansie: trê incuintris par cure dal Servizi Sociâl dai Comuns de Cjargne
lunis 3 di Avrîl dal 2023
A Tumieç, li dal CoLab
Za prime de pandemie di Covid-19 la ansie e lis dificoltâts che i son leadis a jerin slargjadis in dute la popolazion. La pandemie e à esasperât ancjemò di plui la situazion, in particolâr inte fasse di etât preadolessenziâl e adolessenziâl. Al somee che i fantats e lis fantatis a sedin daûr a frontâ chest discomut simpri di plui e in maniere slargjade e stramontante, sedi a nivel nazionâl che regjonâl.
Il Servizi sociâl dai Comuns de Cjargne – Ent Gjestôr ASU FC, scoltadis lis esperiencis di preadolessents e adolessents e lis preocupazions dai gjenitôrs e dai insegnants, al promôf un percors sperimentâl curt, promozionâl e preventîf, no terapeutic, indreçât ai adolessents, residents in Cjargne e che a frecuentin lis classis de 1e ae 5e di Scuelis secondariis di II grât o di Ents di formazion. Il percors, che al è formât di trê incuintris di dôs oris l'un, in orari pomeridian e in grup piçul, al vûl judâ i fantats e lis fantatis adolessents a gjestî pal miôr la tension, la ansie e lis lôr manifestazions, presentant tecnichis specifichis e semplicis par frontâlis.
La ansie, par ognidun di nô, si pues manifestâ in contescj diferents: tes amiciziis, in famee, tes relazions afetivis, tal sport, te vite sociâl, a scuele… L'obietîf dal percors al è chel di sclarî lis diviersis manifestazions e intensitâts de ansie, che e à ancje une funzion positive, se e reste dentri di cierts limits. E piert la sô utilitât cuant che invezit di jessi di stimul par frontâ lis variis situazions che la vite e propon, e devente un ostacul, un limit, blocant intun stât di inerzie cui che le prove. Alore, fevelâ di ce che nus sucêt e condividi cognossincis e imprescj par podê frontâ une esperience umane comune a ducj al trasforme ce che no cognossìn in alc che o cognossìn, e nus fâs vê cussience des capacitâts e des pussibilitâts che o vin par frontâ chel che la vite nus met denant.
I trê incuintris si fasaran a Tumieç li dal CoLab (in vie Carnia Libera 1944) cun chest calendari:
- joibe ai 23 di Març dal 2023 des 13.30 aes 15.30;
- joibe ai 30 di Març dal 2023 des 13.30 aes 15.30;
- lunis ai 3 di Avrîl dal 2023 des oris 14.00 aes 16.00.
Lis ativitâts a saran gjestidis di Gaia Pecile, educadore dal Servizi sociâl dai Comuns de Cjargne, e de dotore Giulia Sillani, psicolighe di comunitât che e lavore tal stes Servizi e che e fâs part de Cooperativa Itaca.
Il percors al è gratuit. A puedin partecipâ massime 15 personis. Il progjet si inviarà cuntun minim di 8 iscrits.
Lis iscrizions a vegnin regjistradis daûr dal ordin di rivade scrivint un messaç par WhatsApp a Gaia Pecile (3351266621) o a Giulia Sillani (3458198667). Si pues notâsi fin lunis ai 20 di Març dal 2023.
Par vê informazions si pues contatâ Gaia Pecile al numar scrit parsore o ae direzion di pueste eletroniche gaia.pecile@asufc.sanita.fvg.it
