Il Servizi Sociâl de Cjargne al organize un incuintri su la figure dal farmacist

Si fevelarà de figure dal farmacist tal incuintri programât par lunis ai 23 di Març a partî des 15, tal centri di agregazion "Podìn Insieme", di vie Oberdan a Tumieç. Lu comuniche il Servizi Sociâl dai Comuns dal ambit teritoriâl de Cjargne che al promôf i incuintris formatîfs vierts ae popolazion, in colaborazion cul Comun di Tumieç e lis realtâts dal tierç setôr.

L'incuintri al sarà organizât in colaborazion cuntune speziarie di Tumieç: "Vie pal  incuintri - al spieghe Andrea Dorni dal Servizi Sociâl - no si fevelarà dome dal rûl dal farmacist tant che professionist sanitari di riferiment, ma ancje de impuartance di cjoli lis medisinis in maniere corete, un aspiet fondamentâl par garantî che lis terapiis a zovin e a sedin siguris".

Pal Servizi Sociâl de Cjargne chest incuintri al sarà une ocasion utile par sclarî dubis comuns, ricevi conseis pratics e capî cemût che doprâ lis medisinis te maniere corete al pues fâ pardabon la diference te nestre vite di ogni dì: "Tant che Aministrazion Comunâl - al zonte l'assessôr Marioantonio Zamolo - o profiti di cheste ocasion par ringraciâ sedi i animadôrs dal Servizi Sociâl, de cooperative Itaca, e la speziarie che e à aderît ae iniziative pe disponibilitât a fâ di tramit tai confronts dai nestris anzians, par spiegâ cetantis funzions che e pues davuelzi la speziarie in dì di vuê. La speziarie e ponte a deventâ un hub sanitari di prossimitât a ducj i efiets e al è impuartant spiegâ, in particolâr ai anzians, in maniere semplice e direte, dutis lis funzions de farmacie e lis rispuestis che si puedin cjatâ culì ancje in merit ae telemedisine, aes vacinazions, al screening".