Cardiologjiis viertis 2026: la Cardiologjie di Udin e aderìs ae campagne pe prevenzion des malatiis cardiovascolârs
Dai 9 ai 15 di Fevrâr
Lis malatiis cardiovascolârs, cun ducj i progrès che a son stâts fats tai ultins decenis par ce che al inten la diagnosi e la cure, a son ancjemò la prime cause di mortalitât a nivel globâl.
Svariâts studis a dimostrin che la prevenzion cardiovascolâr, sedi primarie che secondarie, e je il mieç che al zove di plui par ridusi la frecuence di events grâfs e di complicancis tal lunc periodi.
La Fondazion "ANMCO per il Tuo cuore", che di plui di vincj agns si impegne in maniere ative te ricercje e te prevenzion cardiovascolâr, dai 9 ai 15 di Fevrâr, in ocasion di San Valentin, e inmanee la iniziative nazionâl di prevenzion cardiovascolâr "Cardiologjiis viertis 2026", che e je rivade ae sô vincjesime edizion.
Dilunc de setemane la Fondazion e à ativât il numar vert 800 05 22 33 dedicât ai citadins che a puedin clamâ in maniere gratuite, di lunis ai 9 a vinars ai 13 des 10 a misdì e des 14 aes 16, par fâ domandis sui problemis leâts aes malatiis dal cûr, che e ricevaran rispueste di 600 cardiolics ANMCO des Struturis che a aderissin ae iniziative, cun 1300 oris di consulence cardiologjiche sore nuie.
La Cardiologjie di Udin e aderìs ae Campagne cun specialiscj dedicâts ogni dì e disponibii a rispuindi par telefon aes domandis de popolazion.