Screening dal cancar dal colon-ret: tal mês di Març a tornin i incuintris cui citadins
Incuintris a Manzan, Martignà e Remanzâs
Ancje tal 2026, pal mês di Març dedicât ae prevenzion, la Gastroenterologjie di Udin e torne a proponi une serie di incuintris publics par sensibilizâ la popolazion sul screening dal cancar dal colon-ret.
I incuintris, inmaneâts cu la colaborazion de LILT, a àn il patrocini dal Ordin dai Miedis di Udin e des societâts sientifichis gastroenterologjichis, e a cjapin dentri ancje la rêt aziendâl dal screening.
I incuintris, sore nuie e vierts ae popolazion, a scomençaran cu la tape di Manzan martars ai 3 di Març e a laran indenant a Martignà (ai 17 di Març) e a Remanzâs (al 1ndi Avrîl).
Prevenzion, scolte e responsabilitât publiche: "La cualitât si le misure ancje de capacitât di scoltâ"
Il screening pal tumôr dal colon ret al zove. I dâts lu confermin: in Friûl-Vignesie Julie, dulà che il program al è in vore dal 2008, la mortalitât e je calade cuasi dal 40% sedi pai oms che pes feminis tai ultins 15 agns. E pûr, cuasi un citadin su doi, tra chei invidâts, ancjemò nol aderìs.
Un dât che al domande di fâ une riflession, no dome sanitarie, ma ancje culturâl e istituzionâl.
"Al è dimostrât che il program al zovi - al aferme Francesco Gongolo, Responsabil de SOSD Screening e Malatiis Cronichis-Degjenerativis di ASUFC - ma, cuntune adesion stabile tai agns tra il 58% e il 60%, o ritignìn che un vêr cambiament al sedi pussibil dome se si metìn in discussion, sensibilizant di plui lis personis, presentantjur il program e scoltant in maniere ative i lôr dubis e lis lôr dibisugnis par cjatâ ideis par miorâ il servizi".
Tal 2025, dilunc des seradis publichis organizadis tai Comuns dal teritori in colaborazion cu la LILT (Leghe Taliane pe Lote cuintri dai Tumôrs) e l'AIGO (Associazion Taliane Gastroenterolics Ospedalîrs), a son stâts cjapâts sù plui di 160 contribûts anonims par capî cuai ostacui che a impedissin di partecipâ. Une iniziative che e à trasformât un moment di informazion intun laboratori di scolte struturât tra istituzions, professioniscj e associazions.
"Lis resistencis principâls no àn a ce fâ cu la cualitât tecniche dal percors - e spieghe Debora Berretti, Diretore de SOC di Gastroenterologjie di Udin - ma fatôrs psicologjics: pôre dal esam, de diagnosi, ansie leade ae preparazion. Tant che istituzion, o vin il dovê di lei chescj dâts e di doprâju par miorâ il servizi in maniere concrete".
La analisi des rispuestis e à permetût di mapâ cun precision i ostacui percepîts: de invasivitât de colonscopie al imbaraç tal gjestî il campion fecâl, fin al fat di sotvalutâ il pericul. Chest patrimoni informatîf al orientarà intervents comunicatîfs e organizatîfs smirâts.
"Se o volìn che lis personis a partecipin - e spieghe Arianna Martinis, Responsabile de Plateforme Endoscopiche ASUFC - prime o vin di scoltâlis. Capî lis lôr pôris al à judât, serade dopo serade, a cjatâ peraulis simpri plui adatis e, cuant che al covente, ancje une ande plui lizere par spiegâ miôr l'esam e acompagnâlis miôr te operativitât di ogni dì".
Une metodiche che e fâs part dal percors di umanizazion des curis, parcè che vê cure dai pazients nol vûl dî dome fâ i esams cu lis proceduris coretis, ma ancje scoltâ dubis e pôris cun atenzion e rispiet.
No si vûl dome sensibilizâ, ma ancje pandi i risultâts in maniere trasparente e condividi lis criticitâts.
"La prevenzion e je une responsabilitât condividude - e siere Berretti - il sisteme sanitari al à di garantî cualitât e sigurece, ma al à ancje di dimostrâ di jessi viert, bon di revisionâ i procès e di vê voie di miorâsi. Dome cussì si rinfuarce la fiducie che e je fondamentâl pe adesion e duncje pe salût de popolazion".