"Cjaminâ a planc": il Servizi Sociâl de Cjargne al propon une ativitât pe salût e pal benstâ dal cuarp
joibe 6 di Març dal 2025
Une iniziative par ducj, tacant di chei che si movin pôc
In chescj dîs a Tumieç a son tornadis a tacâ lis cjaminadis setemanâls lentis par ducj, massime par chei che a àn cualchi dificoltât tal movisi e che par chest a evitin dispès lis buinis pratichis che a fasin ben ae salût.
Il Servizi Sociâl dai Comuns dal ambit teritoriâl de Cjargne, in colaborazion cu la Coop Itaca, al invide inmò une volte la popolazion a partecipâ ae iniziative “Cjaminâ a planc”, programade ogni vinars tal centri di Tumieç: si cjatisi simpri aes 10 li de cjasute de aghe di vie Gortani. La iniziative e je vierte a ducj, in mût particolâr a chês personis che a àn plui dificoltâts te ativitât motorie e che par chest motîf masse voltis a evitin di impegnâsi in chestis ativitâts buinis pe salût, cualchi volte ancje par pôre di fâsi spietâ di chei altris. La cjaminade lente e dure cirche une ore e mieze e cui che al partecipe al pues fâ lis polsis che i coventin, se a 'nd à bisugne.
"Ce che o proponìn – al sclarìs Andrea Dorni, animadôr dal Servizi Sociâl cjargnel – a son cjaminadis lentis cuntun percors studiât di pueste par cui che al à cualchi dificoltât, di fat tal percors de cjaminade cui che al à bisugne di polsâ al pues fermâsi tes bancjutis comunâls cence pôre di restâ indaûr, parcè che al pues fâ cont su la presince dai animadôrs. L’obietîf al è chel di judâ in particolâr chês personis che si movin pôc cuntune ativitât che e manten in salût e che e jude la socializazion".
“Cjaminâ a planc” e va daûr des liniis vuide de Organizazion Mondiâl de Sanitât, ripuartadis dal Istitût Superiôr di Sanitât, che a consein aes personis cun plui di 65 agns di etât di fâ tra i 150 e i 300 minûts par setemane di ativitât motorie a intensitât moderade, simpri daûr des lôr pussibilitâts.
La iniziative e fâs part dal progjet “Vestu?”, promovût dal Comun di Tumieç cu la partecipazion des associazions culturâls e di volontariât, e il so obietîf al è chel di sensibilizâ la popolazion anziane sui stîi di vite corets: e previôt diviersis ativitâts peadis al moviment, ae formazion, al benstâ, cun incuintris informatîfs su argoments come la buine alimentazion e la vite ative.
L'apontament al ven ripetût ogni setemane di vinars, e no si fâs se al è brut timp. Par notâsi e par domandâ informazions si pues contatâ l'animadôr Andrea Dorni al numar 3471173364.