"Camminare lentamente" ("Cjaminâ a planc"), e torne a partî joibe ai 5 di Març la iniziative dal Servizi Sociâl de Cjargne
Une iniziative par ducj, tacant di chei che si movin pôc
Il Servizi Sociâl dai Comuns dal ambit teritoriâl de Cjargne al informe che joibe ai 5 di Març e tornarà a partî "Camminare lentamente"; la iniziative che e promôf lis buinis pratichis di salût, in program ogni joibe tal centri di Tumieç.
La iniziative, metude adun in colaborazion cu la Coop Itaca, e je vierte a ducj ma in particolâr a chês personis che a fasin plui dificoltât te ativitât motorie: "Ce che o proponìn – al spieghe Andrea Dorni, animadôr dal Servizi Sociâl cjargnel – a son cjaminadis lentis cuntun percors studiât di pueste par cui che al à cualchi dificoltât, di fat tal percors de cjaminade cui che al à bisugne di polsâ al pues fermâsi tes bancjutis comunâls cence pôre di restâ indaûr, parcè che al pues fâ cont su la presince dai animadôrs. L’obietîf al è chel di judâ in particolâr chês personis che si movin pôc cuntune ativitât che e manten in salût e che e jude a socializâ".
“Cjaminâ a planc” e va daûr des liniis vuide de Organizazion Mondiâl de Sanitât, ripuartadis dal Istitût Superiôr di Sanitât, che a consein aes personis cun plui di 65 agns di etât di fâ tra i 150 e i 300 minûts par setemane di ativitât motorie a intensitât moderade, simpri daûr des lôr pussibilitâts.
L'apontament pes cjaminadis al è ogni joibe aes 10 li de cjasute de aghe di vie Gortani a Tumieç: si cjaminarà ben planc par cirche une ore e mieze.
La iniziative e fâs part dal progjet “Vestu?”, promovude dal Comun di Tumieç cu la partecipazion des associazions culturâls e di volontariât, cul obietîf di sensibilizâ la popolazion anziane sui stîi di vite corets: e previôt diviersis ativitâts leadis al moviment, ae formazion, al benstâ, cun incuintris informatîfs su argoments come la buine alimentazion e la vite ative: "Un invît a lâ fûr di cjase praticant une ativitât motorie lizere - al interven l'assessôr Marioantonio Zamolo - ven a stâi une cjaminade, un moment di incuintri tra anzians, cun personis che o cognossês za o che o varês ocasion di cognossi miôr, un mût par passâ une matine in compagnie, une ocasion par ducj, ma ancje pes fameis. Il dut in sigurece: i partecipants a son acompagnâts di personâl espert de cooperative Itaca".
L'apontament al ven ripetût ogni setemane di joibe, e se al è brut timp no si va. Par notâsi e par domandâ informazions si pues contatâ l'animadôr Andrea Dorni al numar 3471173364.