COVID-19 - Inzornament des modalitâts di gjestion dai câs

CÂS CONFERMÂTS

Lis personis che a son positivis daûr di une prove diagnostiche molecolâr o antigjeniche pal SARS-CoV-2 a son sometudis ae misure dal isolament, cun chestis modalitâts:

• pai câs che a son simpri stâts asintomatics e par chei che a ogni mût no presentin sintoms di almancul 2 dîs, l'isolament al podarà finî passâts 5 dîs de prime prove positive o di cuant che si son vûts i prins sintoms, cence tignî cont se e je stade fate la prove antigjeniche o molecolâr; pai câs che a son simpri stâts asintomatics l'isolament al podarà finî ancje prime dai 5 dîs se une prove antigjeniche o molecolâr fate intune struture sanitarie/farmacie e da un risultât negatîf.
• pai câs in sogjets imunodeprès, l'isolament al podarà finî dopo di un periodi minim di 5 dîs, ma dome dopo di vê fate une prove antigjeniche o molecolâr cuntun risultât negatîf.
• pai operadôrs sanitaris, se a son asintomatics di almancul 2 dîs, l'isolament al podarà finî tal moment che une prove antigjeniche o molecolâr e je negative.
• I citadins che a son jentrâts in Italie de Republiche Popolâr Cinese intai 7 dîs prin de prime prove positive a podaran finî l'isolament dopo un periodi minim di 5 dîs de prime prove positive, se a son asintomatics di almancul 2 dîs e negatîfs a une prove antigjeniche o molecolâr.

Al è obligatori, ae fin dal isolament, l'ûs di dispositîfs di protezion des viis respiratoriis FFP2 fin ae decime dì dal principi de sintomatologjie o de prime prove positive (tal câs dai asintomatics). Si racomande dut câs di evitâ personis cuntun pericul alt pe lôr salût e/o ambients plens di int. Chestis precauzions si puedin dismeti se si è negatîfs a une prove antigjeniche o molecolâr.

CONTATS STRETS DI CÂS

Par chei che a àn vût contats strets cun sogjets che a son stâts confermâts positîfs al SARS-CoV-2 si apliche il regjim de autovigjilance. Dilunc di chest periodi al è obligatori vê sù dispositîfs di protezion des viis respiratoriis FFP2, in ambients sierâts o in presince di tante int dade dongje, fin ae cuinte dì dopo de date dal ultin contat stret. Se vie pal periodi di autovigjilance si palesin sintoms carateristics di une pussibile infezion di Sars-Cov-2, si racomande di fâ daurman une prove antigjeniche o molecolâr pe rilevazion dal SARS-CoV-2.
I operadôrs sanitaris a àn di fâ une prove antigjeniche o molecolâr ogni dì fin ae cuinte dì dal ultin contat cuntun câs confermât.