Avîs public pe predisposizion di une graduatorie aziendâl di miedis pediatris di libare sielte disponibii pal conferiment eventuâl di incarghis provisoriis o di sostituzions - An 2023

Avîs public pe predisposizion di une graduatorie aziendâl di miedis pediatris di libare sielte disponibii pal conferiment eventuâl di incarghis provisoriis o di sostituzions - an 2023

La Aziende sanitarie universitarie Friûl Centrâl e comuniche, daûr di ce che al previôt l’articul 19, comis 7 e 8, dal acuardi coletîf nazionâl (di chi indenant denominât ACN) pe dissipline dai rapuarts cui miedis pediatris di libare sielte, in vore dai 28 di Avrîl dal 2022, che e vûl realizâ une graduatorie aziendâl di miedis pediatris di libare sielte disponibii pal eventuâl conferiment di incarghis provisoriis o di sostituzions.

1. Recuisîts specifics di amission inte graduatorie
Par jessi ametûts inte graduatorie, si à di vê chescj recuisîts:

• citadinance taliane o di un altri Paîs de UE, cjapadis dentri lis ecuiparazions disponudis des leçs in vore
• iscrizion ae Liste professionâl
• diplome di specializazion in pediatrie o intune dissipline ecuivalente (DM dai 30 di Zenâr dal 1998)

2. Modalitâts e tiermins pe presentazion de domande
I pediatris che a son interessâts al conferiment des incarghis a àn di presentâ la domande doprant il model in zonte, acompagnât dal paiament di un bol di 16,00€, dentri dal tiermin perentori di trente dîs de date di publicazion di chest avîs sul sît aziendâl (www.asufc.sanita.fvg.it, sezion dedicade ai concors, incarghis personâl convenzionât), pene la esclusion de incarghe.

Lis domandis a van mandadis dome midiant pueste eletroniche certificade (PEC) ae direzion asufc@certsanita.fvg.it. Il tiermin ultin par inviâlis al è fissât aes 23.59 dal dì di scjadince dal avîs. Intal ogjet dal messaç di PEC si à di scrivi “Avviso per la graduatoria aziendale pediatri di libera scelta”. La validitât di cheste spedizion, daûr di ce che e fisse la normative in vore, e je
subordenade al ûs, de bande dal candidât, di une casele di pueste eletroniche certificade personâl.

La spedizion fate di une casele di pueste eletroniche semplice/ordenarie, o di une PEC che no je chê personâl, ancje se indreçadis ae casele PEC aziendâl no saran ritignudis validis. La aministrazion no je responsabile par eventuâi problemis informatics che a impedissin il recapit coret. Lis domandis, di presentâ in formât PDF, a àn di jessi firmadis in modalitât digjitâl o olografiche, zontant tal secont câs, simpri in formât PDF, un document di identitât valit.
Cu la domande si à di mandâ ancje il modul pe atestazion di paiament de impueste di bol. La marcje di bol, che si à di meti intal spazi di pueste, e à di jessi anulade cu la aposizion de date e de firme su la stesse e su part dal modul. In alternative, si pues paiâ il bol digjitâl online.
Dute la modulistiche e à di jessi jemplade e inviade in formât PDF.
Lis comunicazions leadis al avîs a vignaran mandadis midiant PEC, ae direzion di PEC dal candidât. La Aministrazion no je responsabile se la direzion di PEC no je juste o se no si rive a leile, o par cualsisedi probleme dal sisteme informatic.
Lis domandis cence sotscrizion, e ancje chês mandadis dopo dal tiermin perentori di scjadince dal avîs a saran esclududis de graduatorie pal conferiment des incarghis.

La domande e à di jessi compilade in mût che si puedi lei. Tal câs che i dâts domandâts a sedin ometûts o incomplets, nol sarà pussibil assegnâ la posizion relative e la incarghe.

3. Criteris di formazion e di ûs des graduatoriis
Daûr dal art. 19 de ACN dai 28 di Avrîl dal 2022, la graduatorie e vignarà fate cun chest ordin di prioritâts:
a) pediatris iscrits inte graduatorie regjonâl F-VJ daûr dal ordin di ponts
b) pediatris che a vedin otignût la specializazion in pediatrie o dissiplinis ecuivalentis dopo de date di scjadince de presentazion de domande di inclusion inte graduatorie regjonâl. In zonte a cheste categorie i pediatris, no iscrits inte graduatorie regjonâl, che a vedin otignût la specializazion in pediatrie o dissiplinis ecuivalentis prime dai 31.01.2022 (dade di scjadince de presentazion de domande di inclusion inte graduatorie regjonâl 2023).

I pediatris dal pont b) a son graduâts daûr de anzianitât di specializazion, dal vôt di specializazion e de etât plui basse.
Pes categoriis a) e b) ditis parsore, lis incarghis a vignaran conferidis dant prioritât di interpel ai pediatris residents intal ambit teritoriâl carent, inte Aziende, po inte Regjon e infin fûr Regjon.
Lis incarghis provisoriis, che no duraran plui di dodis mês, a finiran ae lôr scjadince o cu la nomine di chei che a àn dirit.
La Aministrazion si risierve la facoltât di valutâ se lis condanis penâls eventuâls o i procediments penâi in cors a puedin impedî il conferiment de incarghe.

4. Disposizions finâls
Lis graduatoriis a son buinis pal an 2023 e sprolungjadis intal 2024 fin che no jentrin in vore lis prossimis graduatoriis aziendâls realizadis in aplicazion dal art. 19, comis 7 e 8, dal ACN dai 28 di Avrîl dal 2022. Par ce che nol è previodût di chest avîs si aplichin lis normis dal ACN dit parsore e ancje lis disposizions normativis nazionâls e regjonâls. Daûr dal Regolament (UE) 2016/679 e dal d.lgjs. dai 30 di Jugn dal 2003, n. 196, i dâts personâi furnîts dai candidâts a son racuets pes finalitâts di gjestion dal Avîs e a son tratâts intune bancje dâts automatizade ancje dopo de instaurazion eventuâl dal rapuart di lavôr, par fins leâts ae gjestion dal rapuart stes. Il conferiment di chescj dâts al è obligatori pe valutazion des recuisîts di partecipazion. L'interessât al gjolt dai dirits de normative dite parsore, che tra chei al è il dirit di acès ai dâts su di se, e ancje di cierts dirits come chel di fâ retificâ, inzornâ, completâ o cancelâ i dâts falâts, incomplets o tirâts sù cence rispietâ la leç, e ancje il dirit di oponisi, par motîfs legjitims, al lôr tratament. Chescj dirits a podaran jessi fats valê inviers de Aziende interessade, titulâr dal tratament relatîf.

Par vê altris informazions, i interessâts a puedin indreçâsi ai uficis de SOC Relazions sindicâls e aplicazions contratuâls, telefonant ai numars 0432-989402, 0432-806172, dal lunis ae joibe des 8.30 aes 12.30.