La Associazion Luca ODV e fâs une donazion ae Pediatrie dal Ospedâl di San Denêl

Tai dîs passâts, tal Ospedâl di San Denêl, si è fate une piçule cerimonie par consegnâ al repart di Pediatrie il regâl de Associazione Friulana Oncologia Pediatrica Luca ODV, o sei un ecograf di ultime gjenerazion (dal valôr di cirche 25.000 euros) e un jetut par visitis (dal valôr di cirche 1.500 euros).

Ae cerimonie, fate li de Pediatrie, a jerin presints la Diretore de Struture, Maria Paola Miani, il Diretôr Sanitari de ASUFC David Turello, il President de Associazion Luca ODV, Andrea Muraro, il vice president Gian Luca Mazzei, i conseîrs Paolo De Antoni e Claudia Bidoli e la segretarie Marina Sivilotti. A àn partecipât ancje miedis e infermîrs dal repart di Pediatrie e di altris reparts dal Ospedâl, e rapresentants di cualchi Servizi Teritoriâl.

Il jetut al coventarà tai ambulatoris de Pediatrie: al è eletric, al à lis ruedis par movilu ator cun facilitât e al complete lis stanziis di visite dal repart.

L’ecograf al è un imprest che aromai si dopre simpri parcè che al permet di visitâ i piçui pazients in maniere complete alì sul puest, cence bisugne di trasferiments. Al è util massime pe ecografie dal toraç, che si fâs une vore dispès cun chest sisteme.

L’ecograf, di piçulis dimensions, facil di doprâ, di movilu, cun 3 sondis ecografichis, inte dotazion dal repart al è un imprest inzornât in plui che al miorarà il lavôr di ogni dì te corsie e tai ambulatoris di emergjence.

A son plui di 20 agns che la associazion Luca ODV e sta dongje des fameis che a àn di frontâ la dure strade des curis oncologjichis pediatrichis.

Nassude tal 1999, fin dal principi si è impegnade a promovi la assistence mediche specialistiche e avanzade te oncologjie pediatriche dal Friûl-Vignesie Julie: e à poiât la creazion di rêts, di colaborazions tra struturis specialistichis e la cualificazion dai miedis;  e à ufiert jutori economic, logjistic e psicologjic aes fameis impegnadis in chescj percors.