La “Associazione Friulana Oncologia Pediatrica Luca ODV" e regale une machine pe assistence domiciliâr dai pazients oncologjics pediatrics
joibe 16 di Març dal 2023
La “Associazione Friulana Oncologia Pediatrica Luca ODV” e à regalât une machine pe assistence domiciliâr dai pazients oncologjics pediatrics: l'acuist al jentre intal progjet plui grant tacât intai agns passâts su la fonde di un contribût di 500.000 euros in 5 agns. Cun chest, la Aziende sanitarie si cjape la incarghe di ativâ il progjet par assisti i pazients oncologjics pediatrics, cjapant dentri ancje lis curis e la assistence a domicili, midiant dal coordenament e de integrazion tra la Cliniche pediatriche e i servizis teritoriâi aziendâi.
Il Diretôr Gjenerâl, dotôr Denis Caporale: “O ringracii la Associazion pal fat di lâ indevant cun chest percors a pro dai pazients pediatrics: il fat di garantî la assistence a domicili e di permeti lis curis a cjase lôr al è un aspiet fondamentâl par judâ i pazients e lis lôr fameis”.
A son plui di vincj agns che la “Associazione Friulana Oncologia Pediatrica Luca ODV” e jude lis fameis che a àn fruts oncologjics in cure tai ospedâi dal Friûl- Vignesie Julie, furnint un jutori economic pai prins dodis mês de malatie e assistence psicologjiche gratuite par un determinât numar di oris; e sosten lis struturis ospedalieris par continuâ a garantî ai fruts la pussibilitât di curâsi dongje di cjase; e finanzie borsis e progjets di studi, l'acuist di machinaris e di furniments tecnologjics pai nosocomis regjonâi. Tra lis altris ativitâts, la Onlus e organize ativitâts ricreativis e formativis pes fameis, par favorî la condivision e l’inseriment te normalitât dopo di une malatie; in plui, e compre materiâl ludic pes stanziis di degjence, par che il periodi di ricovar dai fruts al sedi plui sopuartabil.