I anzians si contin: publicâts i videos a Malborghet e Valbrune e a Glemone

I doi videos che a son stâts realizâts pal progjet «Video, vidi, vicit. Volti, sguardi e voci per raccontare nuovi modi di vivere l’età anziana» a àn chescj titui: “Le cose che fanno stare bene” e “Reinventarsi. Quando arrivare è di nuovo partire”. A son stâts presentâts in Avrîl a Malborghet e Valbrune e a Glemone intant dal event “Gli anziani si raccontano”.

Il progjet «Video, vidi, vicit», al è stât promovût dal Servizi sociâl dai Comuns, cu la colaborazion de Associazion «Primi Piani ODV» e de cooperative sociâl Aracon, e cul patrocini des Comunitâts di Mont dal Glemonàs e dal Cjanâl dal Fier-Valcjanâl. Al è nassût daûr de esperience che a àn fat dilunc dal lockdown un educadôr dal servizi sociâl e dôs animadoris des cooperativis Aracon e CODESS FVG: in chei mês a vevin fat telefonadis di monitorament a plui di otante anzians dal teritori e intervents di animazion a distance cjapant note dai sintiments e dai pinsîrs, des lôr memoriis e riflessions.

Il lavôr fat dai operadôrs al à evidenziât la dibisugne di racuei lis testemoneancis dai anzians cun modalitâts e struments che a mantignissin cun fedeltât e completece lis carateristichis espressivis – linguistichis, stilistichis, verbâls, no verbâl, e v.i.: l'obietîf al jere chel di produsi materiâi funzionâi al lavôr educatîf e formatîf cui anzians e ae valorizazion dal “patrimoni uman” locâl. Par chest fin si è pensât che il lengaç audiovisîf al podeve sei il plui adat.

«I promotôrs dal progjet nus àn dât il compit di contâ une storie che e podès motivâ altris anzians e rompi la cundizion comune di autoisolament che e je imponude dispès par fuarce de societât», a disin i esperts de associazion «Primi Plani ODV». «Di fat, tancj anzians no cirin plui stimui gnûfs parcè che a tachin a crodi di “jessi vecjos”, ancje se il fisic e il cjâf ur permetaressin une vite plui che dignitose, buine di racuei stimui gnûfs».

Al è stât un dialic tra anzians, operadôrs, esperts, volontaris e colaboradôrs, che di chescj cualchidun al veve partecipât al Cors di formazion su videomaking, fotografie e scriture inmaneât de associazion «Primi Piani ODV» intal mês di Setembar dal 2021. Si è fate une schirie di intervistis audiovisivis ai anzians dal teritori che dopo a son stadis metudis dongje intai doi videos.

Lis intervistis, i videos e dut il progjet «Video, vidi, vicit» a àn il fin di valorizâ la esperience des personis anzianis dal teritori par promovi l'invecjament atîf di altris anzians e di sensibilizâ lis comunitâts locâls su lis tematichis leadis ae etât anziane.

Par informazions: Servizi sociâl dai Comuns dal ambit teritoriâl dal Glemonàs e dal Cjanâl dal Fier-Valcjanâl – 0432.98.95.36.