I anzians si contin: ai 22 e ai 29 di Avrîl a Malborghet e Valbrune e a Glemone
joibe 20 di Avrîl dal 2023
In colaborazion cul Servizi Sociâl dai Comuns dal Glemonàs e dal Cjanâl dal Fier-Valcjanâl
Si intitulin “Le cose che fanno stare bene” e “Reinventarsi. Quando arrivare è di nuovo partire” i doi videos realizâts inte suaze dal progjet «Video, vidi, vicit. Volti, sguardi e voci per raccontare nuovi modi di vivere l’età anziana” che a saran presentâts tal event «Gli anziani si raccontano».
Il prin apontament al è previodût par sabide ai 22 di Avrîl dal 2023, aes 10.00 li dal Palaç Venezian a Malborghet e Valbrune. Il secont si fasarà sabide ai 29 di Avrîl, simpri aes 10.00 te sede de Comunitât di Mont dal Glemonàs, a Glemone.
Il progjet «Video, vidi, vicit», promovût dal Servizi sociâl dai Comuns cu la colaborazion de Associazion «Primi Piani ODV» e de Cooperative Sociâl Aracon e cul patrocini des Comunitâts di Mont dal Glemonàs e dal Cjanâl dal Fier-Valcjanâl, al è nassût dopo de esperience che si è disvilupade intant dal lockdown, cuant che un educadôr dal Servizi sociâl e dôs animadoris des Cooperativis Aracon e CODESS FVG a àn fat telefonadis di monitorament a plui di otante anzians dal teritori e intervents di animazion a distance racueìnt i lôr stâts di anim e pinsîrs, lis lôr memoriis e riflessions.
Il lavôr dai operadôrs al à evidenziât la dibisugne di racuei lis testemoneancis dai anzians cun modalitâts e imprescj che a podessin rifleti cun fedeltât e completece lis specificitâts – linguistichis, stilistichis, verbâls, no verbâls e v.i. – e cul obietîf di produsi materiâi funzionâi pal lavôr educatîf e formatîf cui anzians e pe valorizazion dal “patrimoni uman” locâl. Il lengaç che si è calcolât plui idoni par chest fin al è stât chel audiovisîf.
«I promotôrs dal progjet nus àn dât la incarghe di contâ une storie che e podès motivâ altris anzians e rompi la cundizion comune di autoisolament detât spes di coercizions creadis de societât», a afermin i esperts de Associazion «Primi Piani ODV». «Tancj anzians, di fat, no cirin plui stimui gnûfs parcè che a tachin a crodi di “jessi vecjos”, ancje se il cjâf e il fisic ur permetaressin une vite plui che dignitose, buine di racuei gnûfs stimui».
Il dialic tra anzians, operadôrs, esperts, volontaris e colaboradôrs – che cualchidun di lôr al à partecipât al Cors di formazion su videomaking, fotografie e scriture condusût de Associazion «Primi Piani ODV» intal mês di Setembar 2021 – si è concretizât intune schirie di intervistis audiovisivis a anzians dal teritori che po a son stadis metudis dongje intai doi videos.
Lis intervistis, i videos e dut il progjet «Video, vidi, vicit» a vuelin valorizâ la esperience des personis anzianis dal teritori par promovi l'invecjament atîf di altris anzians e sensibilizâ lis comunitâts locâls su lis tematichis leadis ae etât anziane.
Par informazions: Servizi sociâl dai Comuns dal ambit teritoriâl dal Glemonàs e dal Cjanâl dal Fier-Valcjanâl – 0432989536.