Premiâts al congrès nazionâl ANOTE-ANIGEA i infermîrs de Gastroenterologjie dal Ospedâl di Udin

A Reggio Emilia,  tal XXXII Congrès Nazionâl ANOTE-ANIGEA (Societât sientifiche dai infermîrs che si interesse di ducj i aspiets de endoscopie, o ben de gastroenterologjie fin ae pneumologjie e urologjie), l'elaborât dai Infermîrs de Gastroenterologjie di Udin al à vint la session Poster.

Il lavôr presentât al è sul program di formazion infermieristiche post lauree “IBD nurse case manager” che, intal ambit di une rêt multidissiplinâr e multiprofessionâl, al valute la ativitât dai infermîrs che a lavorin te gjestion des IBD. Lis malatiis inflamatoris intestinâls cronichis (acronim inglês di IBD-Inflammatory Bowel Disease) a saressin in gjenerâl doi gjenars di patologjiis: la malatie di Crohn e la colite ulcerose.

A son dôs malatiis cronichis cuntun caratar inflamatori e cuntun decors clinic alternât, caraterizât di periodis di riacutizazion e di periodis di remission. Lis IBD a son malatiis une vore complessis, che par solit a interessin i  zovins. In plui dal aparât gastrointestinâl, a puedin coinvolzi ancje altris orghins (par esempli lis articolazions, il voli, la piel e il fiât).  A cirche il 25% dai pazients ur coventin, intal cors de lôr vite, terapiis gnovis cun farmacs biotecnologjics che a vegnin soministrâts par vie endovenose o par vie sotcutanie.

L'ambulatori dedicât aes IBD de Gastroenterologjie di Udin, che al à tant che referent il dotôr Marco Marino, judât di altris 3 gastroenterolics, al cure plui di 1200 pazients. A coordenâ il lavôr dai Gastroenterolics, e di chês altris figuris professionâls coinvoltis (chirurc, radiolic, psicolic, reumatolic, dietist, e v.i.), a son i infermîrs “dedicâts” de Gastroenterologjie, che in chescj agns a àn contribuît a miorâ i percors intes IBD cun standards di cure di cualitât alte.

 “Cheste e je la sanitât publiche che e funzione” e comente Arianna Martinis, coordenadore infermieristiche de sezion Endoscopiche “une sanitât che e viôt une colaborazion intense tra infermîrs e miedis par un obietîf comun: il benstâ dai nestris pazients”. “O esprim preseament e agrât pal ricognossiment nazionâl che a àn meretât i Infermîrs de Endoscopie di Udin, pal progjet inovatîf di buinis pratichis organizativis e di integrazion multiprofessionâl” e conclût Debora Berretti, Diretore de SOC de Gastroenterologjie, “e mi auguri che il progjet al ledi indenant, che si slargji e che al puedi jessi un model ancje par altris realtâts”.