A.N.D.O.S. Tumieç al regale un ecograf ae radiologjie dal Ospedâl de Cjargne

Lunis ai 16 di Zenâr te aule magne dal Ospedâl di Tumieç si è fate une cerimonie piçule par consegnâ ae Radiologjie dal ospedâl un gnûf ecograf, di ultime gjenerazion, bon par fâ investigazions di diagnostiche senologjiche: il strument al è stât regalât dal Comitât A.N.D.O.S. odv di Tumieç che al à promovût une racuelte di fonts che in pôcs mês e à permetût di rivâ ae cifre che e coventave par comprâlu.

Ae cerimonie a jerin presints il Diretôr Sanitari de ASUFC, David Turello, il Diretôr dal Presidi di San Denêl-Tumieç, Loris D’Orlando, il Diretôr de Radiologjie, Massimo Valentino, la presidente de A.N.D.O.S., Sonia Piller Roner, l'Assessôr aes Politichis sanitariis e sociâls dal Comun di Tumieç, Marioantonio Zamolo. E à partecipât ancje la “Associazione Oncologica Alto Friuli” tant che associazion amie e che e je ative sul teritori.

L’ecograf al à programs che a son tra i plui resints presints sul marcjât, e al pues otignî imagjins di alte risoluzion e di cualitât ecelente.

La presidente dal Comitât, Sonia Piller Roner: “Chest risultât al è stât pussibil in graciis de poie di aziendis privadis dal Friûl de Alte, di grups di volontariât di paîs, di citadins singui; ancjemò une volte la sensibilitât e la gjenerositât di tancj a àn permetût di miorâ inmò di plui la cualitât des prestazions furnidis a pro des feminis dal nestri teritori, propit come che al jere sucedût cu la donazion, intai agns passâts, de tomosintesi mamografiche, che ancje la A.N.D.O.S. e veve contribuît”.

Massimo Valentino al à presentât il grup des specialistis che si interessin dal percors senologjic: al à ricuardât la impuartance di struments come chel regalât e de colaborazion continue cul comitât A.N.D.O.S., metint simpri tal prin puest la prevenzion des feminis e de comunitât in gjenerâl.

David Turello: “Graciis ae Associazion e aes realtâts dal tierç setôr che cun cheste donazion a permetin di continuâ a garantî percors di salût, soredut cuant che si fevele di prevenzion, e in areis dificilis tant che chês di mont, dulà che l'acès aes curis al è plui complicât”.

Il Comitât A.N.D.O.S. di Tumieç al è presint sul teritori dal Alt Friûl dal 1986; al promôf azions par dâ supuart aes feminis operadis e ae prevenzion/diagnosi preventive dal tumôr dal sen.

Il comitât al à cuasi 600 feminis associadis che 250 cirche a son feminis operadis; al è atîf cun plui iniziativis, par esempli incuintris vierts ae popolazion, poie ae campagne di scandai mamografic regjonâl, azions fatis ancje adun cu la Aziende Sanitarie par favorî la adesion ai esams di diagnostiche senologjiche. La donazion de ecograf al è un altri tassel metût adun, intune otiche di miorament continui a pro des feminis.