Acuardi ASUFC-CRO: al scomence il percors pe creazion di une biobancje uniche
lunis 3 di Avrîl dal 2023
L'obietîf al è chel di dâ al citadin rispuestis di salût simpri plui validis, fasint in mût che i ricercjadôrs dal Friûl-Vignesie Julie a puedin operâ intes miôr cundizions pussibilis, pe prevenzion e pe cure di tantis patologjiis.
Chest al è il concet pandût dal vicegovernadôr cun deleghe ae Salût dal Friûl-Vignesie Julie, che al à partecipât ae sigle dal protocol di intese firmât a Udin, intai spazis dal ospedâl Santa Maria della Misericordia, dal diretôr gjenerâl dal Centri di riferiment oncologjic di Davian (Cro) e dal diretôr gjenerâl de Aziende sanitarie universitarie Friûl centrâl (Asufc), denant di tancj ricercjadôrs e professioniscj de salût.
L'acuardi - cemût che al à evidenziât l'esponent de Zonte - al à l'obietîf di dissiplinâ i rapuarts tra Cro e AsuFc, par condividi l'asset organizatîf e lis cognossincis in cjamp gjestionâl che a coventin par fâ une uniche biobancje regjonâl, articolade intes sedis di plui aziendis sanitariis regjonâls. Chel di vuê al è un prin pas impuartant par rivâ a chest travuart.
La biobancje e je une struture che, in mût sistematic e daûr standards di cualitât, definîts, e racuei campions biologjics di personis sedi sanis sedi tocjadis di patologjiis, par fins di ricercje, par ufrî curis simpri plui smiradis e zovevulis.
L'obietîf al è chel di fâ "fevelâ" aes diviersis biobancjis il stes "lengaç", pe condivision dal savê. Par fâlu si dopraran i stes sistemis gjestionâi informatics, i stes protocoi operatîfs e i standards di cualitât identics; si condividarà ancje la modulistiche che e deventarà compagne par ducj te gjestion dal consens informât. Cuntun catalic de biobancje, la Regjon e favorìs la uniformitât des domandis e la archiviazion dai campions.
Intal ringraciâ i professioniscj de salût e i ricercjadôrs pal lavôr che a fasin ogni dì cun competence e abnegazion, il vicegovernadôr al à ricuardât che la lôr ativitât e je tant impuartante ma pôc cognossude de popolazion e, partant, che si à di fâle cognossi il plui pussibil aes comunitâts, che di fat a son lis destinatariis dai risultâts di ricercjis cussì lungjis e complessis: un lavôr pôc cognossût ma cuntune impuartance straordenarie e un nivel di ecelence une vore alt. Che al sarà simpri sostignût de Regjon.
I campions furnîts de biobancje a clinics e ricercjadôrs ur permetin di publicâ studis di rilêf a nivel internazionâl e di validâ gnovis strategjiis diagnostichis terapeutichis.
La biobancje dal Irccs Cro di Davian e conserve cirche 150.000 campions oncologjics di 10.000 pazients. Vuê il 90% des personis assistudis dal Centri di riferiment di Davian al da il consens par furnî il propri campion daûr dal so percors, favorint la ricercje.
La biobancje di AsuFc e conserve campions pe ricercje leade ae Sla, aes malatiis neuromuscolârs e lisosomiâls, aes malatiis leadis al invecjament, cjapadis dentri chês gjenetichis e pal studi de vulnerabilitât de popolazion anziane a patologjiis infetivis tant che il Covid-19, e malatiis raris.
Font Regjon F-VJ