ANDOS Tumieç e Oncologjie: creativitât e solidarietât par un jutori concret a cui che al fronte la chemioterapie
Preparadis borsis par contignî l'elastomar
Une prossimitât concrete che e ten dongje la cure mediche e il calôr uman: al è chest il significât de iniziative nassude de colaborazion tra la Oncologjie e un grup di volontariis dal Comitât ANDOS di Tumieç e di tantis altris feminis che a àn rispuindût al invît de SOC di Oncologjie dal Presidi Ospedalîr San Denêl - Tumieç, cusint a man sacuts par tignî l'elastomar, un dispositîf che al conten il medisinâl chemioterapic, che, midiant di un acès venôs, al permet la infusion continue tal zîr di cualchi dì.
L'obietîf dai sacuts al è chel di integrâ la terapie te vite di ogni dì de persone, ufrint un acessori pratic che al protezi il dispositîf, al rindi facil puartâlu ator e al permeti di movisi cun plui libertât, judant cussì a miorâ la cualitât de vite durant il percors di cure.
Une grande abilitât, manualitât, competence, creativitât e soredut la gjenerositât des volontariis, che a àn acetât cun entusiasim l'invît de oncologjie, a àn za permetût di realizâ passe un centenâr di sacuts, ognidun confezionât cun grande atenzion ai detais par rispuindi aes carateristichis pratichis necessariis e, tal stes timp, donâ une man di colôr, di origjinalitât e di calôr uman a cui che al sta frontant une malatie oncologjiche.
Cheste iniziative e je a pâr cul progjet "Con ago e filo... con il cuore" dal Comitât ANDOS, atîf za di cualchi an, che al previôt di regalâ une borse cuside a man aes feminis che a frontin un intervent chirurgjic par tumôr dal pet. In gracie di chest progjet fin cumò a son stadis donadis plui di 200 borsis, dutis diferentis, vêrs tocs unics.
Come che al sucêt pai sacuts puarte elastomar, pur rispietant lis indicazions funzionâls necessariis, ogni creazion e riflet la fantasie e la sensibilitât di cui che le à cuside.
Chestis iniziativis a testemoniis cemût che la colaborazion tra volontariât e struturis sanitariis e pues contribuî in maniere concrete a umanizâ lis curis, ricuardant che dongje des competencis professionâls e dai trataments plui avanzâts a cjatin spazi ancje azions semplicis, in grât di trasmeti atenzion, vicinance e sperance.
La SOC di Oncologjie e vûl ringraciâ di cûr dutis lis volontariis che, cul lôr timp, creativitât e sensibilitât, a àn rindude pussibile cheste iniziative. Chest contribût al rapresente un esempli preziôs di cemût che la solidarietât e pues deventâ part integrante dal percors di cure, ufrint ai pazients no dome un jutori concret, ma ancje un segnâl reâl di umanitât e di empatie.