Dai 2 ai 6 di Dicembar screening e consulencis gratuits, cun acès libar e cence apontament

Ogni an, il 1ⁿ di Dicembar, si celebre la Zornade mondiâl pe lote cuintri dal AIDS par sensibilizâ la popolazion su la epidemie mondiâl di AIDS leade ae difusion dal virus dal HIV.  Cheste zornade, che la OMS e à istituît tal 1988, e je une ocasion par difondi lis cognossincis su la infezion di HIV, su cemût che si le passe e su la impuartance di fâ l'esam daurman, par rivâ a inviâ il percors terapeutic par timp. 

Pal 1ⁿ di Dicembar, il Servizi di Malatiis Passadis par vie Sessuâl dal Dipartiment di Prevenzion de ASUFC al inmanee une setemane di sensibilizazion sul argoment e al ufrìs screenings e consulencis gratuits, cun acès libar e cence apontament.

Di lunis ai 2 a joibe ai 5 di Dicembar, des 8:30 aes 17:00, e vinars ai 6, des 8:30 aes 13:00, un operadôr sanitari dal centri Malatiis Passadis par vie Sessuâl al sarà a disposizion di ducj chei che a vuelin vê informazions e fâ l'esam, gratuit e anonim, pe ricercje de infezion di HIV e des malatiis plui comunis passadis par vie sessuâl.