Screening dal colon ret
Il tumôr dal colon ret al è il tumôr che al colpìs la ultime part dal intestin e al è il secont tumôr plui presint te popolazion taliane.
Si disvilupe di piçulis lesions buinis (polips o adenomis) che a puedin, intal timp, trasformâsi in tumôr.
Al è un procès une vore lent (10-15 agns) e duncje al è pussibil fâ une diagnosi precoce midiant di esams specifics.
L'esam al permet la diagnosi precoce dai tumôrs tal colon; di fat, il sanganament al è un dai segnâi plui precoçs di cheste malatie: al pues jessi individuât tai escrements, ancje se nol è visibil a voli.
Al è par oms e feminis di etât tra i 50 e i 69 agns. I citadins di cheste fasse di etât a son invidâts a fâ l'esam pe ricercje dal sanc platât.
Il kit pal esam al pues jessi ritirât in farmacie dentri di doi mês dal riceviment de letare di invît.
Ogni doi agns e ven mandade une letare a oms e feminis tra i 50 e i 69 agns che ju invide a fâ l'esam pe ricercje dal sanc platât tai escrements.
L'esam al è facil e si pues fâ a cjase: si racuei un piçul campion di escrements cul stecut di pueste e si lu met dentri tal provin. Il provin al va tignût tal frigorifar e puartât in farmacie dentri di 24 oris dal prelêf. La farmacie e inviarà il provin al laboratori specializât pes analisis.
Se il test al è negatîf (nol è sanc platât tai escrements), e rive une letare di rispueste a cjase dopo cirche dôs setemanis dal esam.
Se il test al è positîf (al è sanc platât tai escrements), la segretarie dal program di screening e clame par completâ i aciertaments.
L'esam e i eventuâi aciertaments a son gratuits, e no covente la impegnative dal miedi.
data ultima modifica: 5 di Otubar dal 2022