Dirits ricognossûts ae maternitât
Il D. Lgjs. 151/2001 al ricognòs i dirits ae maternitât e ae paternitât. In zonte aes astensions previodudis dai congjêts obligatoris e facoltatîfs descrits te vôs di prime, altris dirits a son:
• astension obligatorie dal pari: 3 mês dopo dal part, dome tal câs che pe mari al sedi impussibil gjoldint;
• astension facoltative o congjêt parentâl: dopo i prins trê mês dal frut e fin ai vot agns, par periodis frazionâts o continuâts;
• congjêt par malatie dal frut: fin ai trê agns, cence limits di timp. Da trê ai vot agns, no plui di 5 dîs par fi ad an. Il congjêt al pues jessi gjoldût in mût alternât tra mari e pari.
Intal timp di astension obligatorie, la norme e previôt la improibizion di licenziament e il dirit ae conservazion dal puest di vore.
Par altris informazions si pues fâ riferiment al INPS (www.inps.it), ai patronâts o ai consultoris.
Dirits ae assistence sanitarie
La gravidance e la maternitât a son tuteladis e assistudis in ogni fase e grât, dal concepiment al part, comprendudis lis fasis di puerperi e la tutele de salût dai minôrs. A son diviers servizis e figuris professionâls che a agjissin in chest setôr e che si pues fâ riferiment par domandâ jutori, informazions e vuide intai aciertaments sanitaris, di là dal supuart intal rûl di gjenitôr.
I servizis e i operadôrs a son:
• il propri miedi di medisine gjenerâl;
• il consultori familiâr dal Distret Sanitari o altris consultoris convenzionâts;
• cliniche ostetriche e gjinecologjiche.
Garanziis di leç pe mari e pal frut
Une femine, taliane o foreste (ancje se iregolâr o clandestine) che no pues viodi dal so frut, e à la pussibilitât di parturî tal ospedâl cence ricognossilu. La femine no varà nissune consecuence personâl e no saran fatis segnalazions aes autoritâts. Il frut al sarà tutelât e protet des autoritâts competentis e al podarà jessi adotât.
La femine foreste iregolâr o clandestine, intant de gravidance e fin a sîs mês dopo de nassite dal frut, e à dirit al permès di permanence, ae tessare sanitarie e ai beneficis leâts a cheste.
Il stât di gravidance al è ricognossût tant che recuisît par otignî la esenzion dal ticket pes prestazions leadis ae gravidance fatis intai istitûts publics o convenzionâts. Par vê la esenzion, la femine e à di fâsi fâ dal gjinecolic specialist (public o convenzionât) la domande di esenzion par stât di gravidance e e à di indreçâsi al so Distret Sanitari di residence pe regjistrazion su la tessare sanitarie.
Cualchi normative nazionâl e regjonâl, cun di plui, e previôt contribûts economics pe nassite di un fi e assegns pai nuclis familiârs cun almancul trê fîs minôrs. La entitât dai assegns e cambie su la base des carateristichis definidis intes diviersis normativis.
Ancje cualchi Comun al pues vê previodût il “bonus bebè”, o ben un contribût destinât aes fameis cun gnûfs nassûts. Dutis lis informazions si puedin domandâ ai uficis anagrafe dai Comuns di residence.