Congjêt par gravidance a pericul

Ce che a previodin lis normis

La maternitât anticipade e je une anticipazion dal congjêt obligatori di maternitât, ricognossude de leç (articui 16 e 17 dal D. Lgjs. 151/2001 – Test Unic maternitât/paternitât) in chestis ipotesis:

a) tal câs di complicazions gravis de gravidance o di formis morbosis preesistentis che si presum che a puedin jessi agravadis dal stât di gravidance (par esempli, chês clamadis “gravidancis a pericul”);

b) cuant che lis cundizions di vore o ambientâls a sedin stimadis prejudiziâls pe salût de femine o dal frut;

c) cuant che la lavoradore assegnade al traspuart e al solevament di pês, e ancje a lavôrs pericolôs, di fature e insans, no puedi jessi destinade a altris funzions.

Cui che al autorize

Cu la jentrade in vore dal “Decret Semplificazions” D.L. dai 9 di Fevrâr dal 2012, n. 5, la competence su la consegne de autorizazion pe astension anticipade dal lavôr par maternitât e je dividude tra Aziende Sanitarie e Direzion teritoriâl dal Lavôr.

• La Aziende Sanitarie e da la autorizazion dome in presince di complicazions gravis de gravidance o di formis morbosis preesistentis che si presum che a puedin jessi agravadis dal stât di gravidance (gravidancis a pericul).
• La Direzion teritoriâl dal Lavôr e da fûr lis certificazions cuant che:

• • lis cundizions di vore o ambientâls a son stimadis prejudiziâls pe salût de femine o dal frut;
  • 
    la lavoradore assegnade al traspuart e al solevament di pês, e ancje a lavôrs pericolôs, di fature e insans, no puedi jessi destinade a altris funzions.

Cui che al pues acedi

Il congjêt anticipât al è un dirit di dutis lis lavoradoris dipendentis, comprendudis chês agriculis e domestichis.

In chei altris câs (par esempli lavoradoris autonomis o in disocupazion), par savê cun esatece se la proprie posizion di vore e sedi compatibile cu la domande di congjêt anticipât par maternitât, si à di indreçâsi al INPS.

Cuant che si pues domandâ la astension dal lavôr

La femine e pues domandâ la astension dal lavôr prime dal setim – otâf mês di gjestazion tal câs di:

• gravidance a pericul
• cundizions di vore o ambientâls danosis pe salût de femine o dal frut
• traspuart o solevament di pês
• altris lavôrs pericolôs, di fature o insans cence pussibilitât di destinazion a altris compits.

Gravidance a pericul

La mari lavoradore che e patissi complicazions intant de gravidance e pues presentâ ae Aziende Sanitarie domande di astension par gravidance a pericul, furnide di un certificât medic compilât di un gjinecolic dal SSN o di un gjinecolic convenzionât.

Il certificât al pues jessi compilât ancje di un specialist privât: in chest câs al varà di jessi validât di une visite mediche legâl.

La certificazion e à di indicâ in maniere esate:

• la patologjie de lavoradore
• la date presumude dal part
• il timp conseât di interdizion dal lavôr.

Esaminade la documentazion presentade e la regolaritât de domande, la Aziende Sanitarie e dispon la interdizion dal lavôr pal timp indicât e e informe la femine incinte e il so datôr di lavôr.