Congjêt par maternitât
Il congjêt di maternitât al è il periodi di astension obligatorie dal lavôr de lavoradore. La durade totâl dal congjêt di maternitât e je di 5 mês, e al pues jessi gjoldût:
- intai doi mês prime de date presumude dal part
- se il part al è dopo di cheste dade, pal periodi che al passe tra la date presumude e chê efetive dal part
- dilunc dai trê mês dopo dal part
O pûr:
- un mês prime dal part
- cuatri mês dopo (par podê lavorâ fin al otâf mês complet di gjestazion, la lavoradore e à di vê une atestazion mediche di indulà che al risulti che la sielte no puarti dams ae salût dal nassint e/o de femine che e spiete)
La leç e previôt un câs là che la durade complessive dal congjêt di maternitât e pues passâ i 5 mês, o ben cuant che il part, une vore premadûr (circolâr INPS n. 69/2016), al sedi prime dai doi mês antecedents la date presumude dal part.
In chest câs, la mari e varà dirit al congjêt di maternitât par:
- ducj i dîs che a passin tra la date efetive dal part e la date di principi dal congjêt (doi mês prime de date presumude dal part)
- plui i cinc mês previodûts pes gravidancis cun decors normâl.
Sospension
Tal câs di ricovar dal neonât intune struture publiche o privade, la mari e à dirit di domandâ la sospension dal congjêt di maternitât fin aes dimissions dal frut; chest dirit al pues jessi esercitât une sole volte par ogni fi e al è subordenât ae produzion di une atestazion mediche che e declari la compatibilitât dal stât di salût de femine cu la riprese de ativitât di vore.
Cui che al pues domandâ il congjêt di maternitât
La dissipline e je indreçade a dutis lis lavoradoris dipendentis, comprendudis chês di aministrazions publichis, a chês cun datôrs privâts di lavôr, aes lavoradoris parasubordenadis e ancje a chês cun contrat di garzonât, e aes sociis lavoradoris di societâts cooperativis.
Il congjêt anticipât
Il congjêt di maternitât al pues jessi anticipât.
Interuzion de gravidance/muart dal frut intant dal congjêt
Se la interuzion de gravidance e je dopo de 180e zornade di gjestazion, la lavoradore e pues ricjapâ in cualsisedi moment la ativitât di vore. A coventin però: 10 dîs di preavîs al datôr di lavôr e une certificazion mediche che e atesti che la riprese dal lavôr no puartarà dam ae lavoradore. Ce che al è ripuartât ca parsore al vâl ancje intal câs di muart premadure dal frut (muart ae nassite o intant dal congjêt).
Tratament economic e previdenziâl
Il congjêt di maternitât:
- al va calcolât inte anzianitât di servizi a ducj i efiets (comprendûts chei de paie suplementâr di Dicembar, des feriis e v.i.)
- al va calcolât tant che periodi di vore pes finalitâts di progression de cariere
- al da dirit a une indenitât dal 80% de retribuzion, intant dal congjêt (N.B.: la contratazion coletive e pues previodi une indenitât plui favorevule ae lavoradore; par esempli, intal setôr public, cheste indenitât e je dal 100% de retribuzion).
Pe pension, il periodi di congjêt al è contât par intîr cul incredit dai contribûts figuratîfs (o sedi i contribûts increditâts, cence cjamis sul lavoradôr, pai periodis che nol à lavorât, tant che intal câs de maternitât). No je domandade nissune anzianitât contributive pregresse.
Intal timp di astension obligatorie, la norme e previôt la improibizion di licenziament e il dirit ae conservazion dal puest di vore.
Par altris informazions si pues fâ riferiment al INPS (www.inps.it), ai patronâts o ai consultoris.