Riabilitazion fisiche
La riprese di une ativitât fisiche regolâr e je un dai aspiets fondamentâi de riabilitazion cardiologjiche. Si cognossin ben i beneficis in tiermins di cualitât di vite e di sorevivence che un esercizi fisic regolâr, modulât in maniere oportune su lis carateristichis dal singul individui, al pues garantî ai pazients cardiopatics dopo di un event acût. Al è par chest che o vin calcolât che al sedi impuartant condividi sul sît aziendâl i nestris programs di esercizi fisic a cuarp libar, dividûts in trê tipologjiis di esercizi su la fonde de cjame di lavôr (2A: cjame basse; 2B: cjame intermedie; 3: cjame alte).
Chescj videos a son stâts realizâts cu la colaborazion di fisioterapiscj, fisiatris e cardiolics dal “Gervasutta”, cul patrocini dal cors di Lauree in Fisioterapie de Universitât dal Friûl; i esercizis a son stâts studiâts par ridusi al minim i traumis a nivel articolâr e di rachide.
I pazients cardiopatics, che a son seguîts li de Cardiologjie Riabilitative, cun cheste iniziative a puedin acedi al video plui adat par lôr, su indicazion dal Cardiolic, dopo di une valutazion globâl iniziâl; e va evitade in assolût la autoprescrizion, tant che par cualsisedi altri medisinâl. In linie di massime, la cjame basse (2A) e je plui indicade pal pazient anzian, decondizionât e sometût di pôc a un intervent cardiochirurgjic; i esercizis di fase 3 a son adats pai pazients atîfs, che no àn altris malatiis e limitazions funzionâls. La cjame intermedie (2B) e je adate pai pazients che no son tant anzians, ma che no son avonde alenâts.
O sin cussients che la condivision di chescj videos sul sît aziendâl e permeti a ducj di acedi a chescj esercizis. Par altri, cemût che o vin za dit prime, i esercizis proponûts a son stâts studiâts di professioniscj e a son a bas impat articolâr, se si fasin in maniere corete. Pe persone “comune”, il consei al è chel di tacâ de cjame plui basse par passâ aes fasis sucessivis e di no fâ propit i esercizis se si vessin di vê disturps di cualsisedi nature; in chest câs, al è ben indreçâsi prime al Miedi di Medisine Gjenerâl.
Si racomande a ducj di zontâ ai esercizis proponûts, che a son di fâ almancul 3 voltis par setemane, une cjaminade di almancul 30 minûts ogni dì a pas moderât (“o ai di sintî il sfuarç fisic, rivant istès a fevelâ intant che o cjamini”); une alternative - in particolâr in chest periodi - e pues jessi la cyclette. La ativitât fisiche regolâr daûr des indicazions de OMS (almancul 150 minûts di ativitât fisiche moderade par setemane) e jude a controlâ i fatôrs di pericul cardiovascolâr, in particolâr la pression arteriose, il colesterôl, il diabete, cuntune riduzion de mortalitât cardiovascolâr e par altris causis (par esempli, tumôrs dal colon, dal pet…).
Marika Werren
Responsabile de Struture di Cardiologjie Riabilitative
IMFR “Gervasutta - Aziende Sanitarie Universitarie dal Friûl di Mieç”