Cui che o sin
Un Ospedâl e Servizi Sanitari che al Promôf la Salût (HPH) al vûl dî une organizazion che e ponte a miorâ il vuadagn di salût pai siei puartadôrs di interès midiant dal disvilup di struturis, di culturis, di decisions e di procès.
La rêt HPH e je focalizade prin di dut sui pazients e sui lôr parincj, cuntune atenzion particolâr aes esigjencis dai grups vulnerabii, dal personâl ospedalîr, de popolazion di comunitât e, par ultin ma no mancul impuartant, dal ambient.
La Rêt internazionâl di ospedâi indreçade ae tutele de salût e je stade istituide de Organizazion mondiâl de sanitât tal 1993 cul fin di favorî e di promovi, adun cu la prevenzion des malatiis e cui trataments riabilitatîfs, la promozion de salût intal ambit de programazion e de gjestion des struturis sanitariis. Intun moment seguitîf, la Rêt internazionâl e je stade integrade cui servizis di assistence primarie.
La rêt HPH e à, duncje, un inlidrisament fuart intes strategjiis de OMS dedicadis al miorament dal vuadagn di salût promovût dai Servizis Sanitaris, cun riferiment sedi ae Cjarte di Ottawa pe Promozion de Salût che e met tra lis sôs 5 strategjiis di fonde il riorientament dai servizis sanitaris bande chest obietîf, sedi i sistemis strategjics de OMS che a indrecin il contribût dai servizis sanitaris al otigniment di obietîfs di salût.
Il progjet OMS Ospedâi e Servizis Sanitaris che a promovin la salût (WHO “Health Promoting Hospitals and Health Services) al à la finalitât di meti dongje i concets, i valôrs e i standards di promozion de salût inte struture organizative e inte culture dal ospedâl, a pro dal personâl, dai pazients e dai lôr parincj e sostignint un ambient san.
La promozion de salût, che e cjape dentri la atenzion ae sigurece e ae cualitât de vite dal pazient e la ricercje de eficacitât e de eficience dai servizis, e je considerade vuê, a nivel european, un dai elements che a influencin di plui la cualitât dai servizis ospedalîrs.
La Rêt internazionâl dai ospedâi pe salût si propon di:
- Promovi intai ospedâi e intai servizis sanitaris une culture e une impostazion interdissiplinâr e un sisteme decisionâl trasparent che al previodi un coinvolziment atîf dai pazients e dai rapresentants dai utents dai servizis.
- Evidenziâ i risultâts otignûts dai ospedâi e dai servizis de rêt in cont de promozion de salût e permeti un scambi di esperiencis tra i ospedâi che a partecipin.
- Valutâ lis ativitâts di promozion de salût intai servizis sanitaris, e promovi in chest setôr une impostazion fondade su lis provis di eficacitât.
- Inserî standards e indicadôrs di promozion de salût intai sistemis di gjestion de cualitât dai servizis sanitaris ospedalîrs e extra ospedalîrs.
Il Ministeri de Salût al à istituît tal 2002 la Rêt HPH & HS taliane, costituide di rêts regjonâls autonomis e ricognossudis dal Ufici European de Organizazion Mondiâl de Sanitât inte suaze dal progjet internazionâl “Health Promoting Hospitals”.
Lis Rêts regjonâls a permetin di creâ colegaments tra diviersis realtâts che, propit par vie di chest lôr leam, a son in stât di confrontâsi une cun chê altre in maniere plui facile sul plan organizatîf, dant vite a sinergjiis pal benstâ dal singul e de comunitât, daûr di orientaments che a favorissin la prevenzion, la cure e la assistence sanitarie e sociâl.
Tal 2003 e je stade costituide la rêt HPH & HS dal Friûl - Vignesie Julie cul obietîf di fâ la promozion de salût intai settings sanitaris daûr de strategjie de Rêt lnternational Health Promoting Hospitals & Health Services HPH.
Sul tacâ dal 2017, il Coordenadôr de rêt regjonâl HPH & HS al domande la adesion di ASUIUD, stant che al è un bon strument pai ospedâi e servizis sanitaris par rispuindi in maniere uniforme e eficace aes dibisugnis di salût de popolazion e aes domandis dai Plans de Prevenzion regjonâls.
Ai 22 di Fevrâr dal 2017, cul decret n. 151, la Aziende sanitarie universitarie integrade di Udin e à aderît ae Rêt Health Promoting Hospitals & Health Services (HPH-HS), Rêt pe promozion de salût intai Ospedâi e intai Servizis sanitaris.
La Direzion centrâl salût, integrazion sociosanitarie, politichis sociâls e famee e fâs bon, cul Decret n. 1100/SPS dai 31 di Lui dal 2018, il “Regolament pal funzionament de rêt HPH dal Friûl - Vignesie Julie” (di ca indevant “Regolament”) che al riclame in maniere esplicite la declarazion di Ottawa pe promozion de salût, che e dîs: “Il riorientament dai servizis sanitaris al à di puartâ a un cambiament di disposizion e di organizazion dai servizis sanitaris, che si concentre su lis dibisugnis totâls dal individui tant che persone interie. Il rûl dal setôr sanitari al à di movisi simpri di plui intune direzion di promozion de salût”.
La salût di pazients, operadôrs e citadins e je tal centri dai valôrs e dai principis che a articolin i struments di lavôr de rêt HPH; pal so otigniment al covente l'impegn di ducj midiant di programs di gjestion integrade e di miorament continui de cualitât pe promozion de salût, metint tal mieç lis dibisugnis dai citadins e valorizant il rûl e la responsabilitât di dutis lis figuris professionâls che a operin intal Sisteme Sanitari Regjonâl.
La rêt HPH dal Friûl - Vignesie Julie, costituide, come che si à dit, intal Novembar dal 2003, e je cumò al cuint mandât di adesion ae rêt Internazionâl.
Il Regolament al definìs la composizion e il funzionament de aministrazion de Rêt HPH a nivel regjonâl e aziendâl, che e je costituide di:
- Direzion centrâl salût, politichis sociâls e disabilitâts
- Coordenadôr regjonâl
- Coordenadôrs aziendâi
- Referents aziendâi dai programs regjonâi
- Link professionâl pe promozion de salût
- Professioniscj dal SSR e des struturis privadis increditadis che a aderissin ae rêt HPH
- Citadins
Une impostazion comprensive e globâl pe promozion de salût in ASUFC
Par realizâ in concret lis potenzialitâts de impostazion HPH, che e je chê di miorâ il vuadagn di salût sedi dai pazients che dal personâl e de comunitât, al covente cressi in maniere progressive no dome inte suaze di progjets limitâts, ma svilupant une impostazion comprensive e globâl, integrade intai sistemis gjestionâi e di cualitât dal ospedâl e dai servizis sanitaris.
Si previôt duncje che la nestre Aziende si indoti di un sisteme che al garantissi la presince di:
- Mandât
Svilupâ une identitât aziendâl HPH - declarazion dai intindiments e criteris organizatîfs corispondents, cun obietîfs esplicits, criteris, standards e indicadôrs pai risultâts, procès e struturis che si concentrin sul vuadagn di salût dai servizis sanitaris. Il supuart de Alte Direzion al covente pe atuazion dal nivel organizatîf.
- Risorsis
Istituî une struture specifiche pe gjestion HPH, cjapant dentri un Comitât diretîf, un coordenadôr e un grup di lavôr, une rêt di personis formadis su la strategjie HPH in dutis lis unitâts de organizazion e il stanziament di un belanç specific HPH.
- Comunicazion
Informâ e cjapâ dentri i clinics e il personâl in azions di comunicazion su la promozion de salût (par esempli, newsletters, presentazions anuâls, forums su sîts Web).
- Azion e planificazion
Svilupâ programs di azion anuâls, cun dentri i progjets specifics pe atuazion e il svilup di politichis specifichis par temis o politichis dedicadis ae popolazion (par esempli ambients libars dal fum, strategjiis pe ecuitât assistenziâl ancje pai citadins che a vegnin di altris Paîs). La Promozion de Salût intai ospedâi e intai servizis sanitaris e à di jessi fondade su la evidence e su la cualitât te stesse maniere che chestis a son la fonde de ativitât cliniche e de erogazion dai servizis.
- Valutazion
Svilupâ e implementâ une struture pe osservazion, il monitorament, la documentazion, la valutazion e la comunicazion regolârs (par esempli doprant i 5 Standards pe Promozion de Salût intai Ospedâi, indicadôrs di Cualitât de Vite, il model EFQM e/o la Balanced Score Card) e colegâ i risultâts finâi a ducj i percors clinics.
- Formazion
Potenziament des capacitâts HPH (formazion professionâl e inzornament, ricercje, svilup di struturis).
- Ricercje
Incoragjâ i progjets HPH cun prestazions di cualitât alte e sostignî la difusion dai risultâts. HPH al è un gnûf cjamp di ricercje là che la pratiche Evidence-Based pe promozion de salût e je definide tant che integrazion tra lis capacitâts clinichis individuâls, lis miôr evidencis disponibilis e lis preferencis dal pazient.
- Azions sostignibilis
Al introdûs lis proceduris di misurazion e di monitorament dai risultâts su la salût, dai impats su la salût e dai vuadagns di salût pai pazients, pal personâl e pe comunitât intal timp. Chescj cambiaments si puedin misurâ tant che risultât clinic in tiermins di mortalitât, morbilitât e salût corelâts ae cualitât de vite, tant che stât di salût personâl, sodisfazion de utence o dal personâl e tant che nivel di alfabetizazion in tiermins di salût (health literacy) e di stât di salût globâl de popolazion.
- Rêt
La rêt a ducj i nivei (locâi, regjonâi, nazionâi e internazionâi) e covente par condividi lis miôr pratichis e lis strategjiis pal miorament de cualitât e l'orientament ae salût dai ambients sanitaris.
Cu la adesion ae rêt Internazionâl HPH, i ospedâi e i servizis sanitaris a deventin part di une rêt internazionâl dulà che il scambi di informazions e la condivision a son promovûts doprant diviers struments tant che newsletters, conferencis, sîts web interatîfs, une biblioteche e un archivi online sul stât di avanzament dai lavôrs dai grups specifics e des task force.