Orghins e tiessûts

Intal nestri Paîs, pe manifestazion de volontât di donâ al è in vore il principi dal consens o de dissension esplicite (art. 23 de Leç n. 91 dal 1ⁿ di Avrîl dal 1999; Decret dal Ministeri de Salût dai 8 di Avrîl dal 2000). L’"assintiment cidin" introdusût dai articui 4 e 5 de Leç 91/99 nol è mai stât atuât.

A ducj i citadins maiôrs di etât duncje e ven ufierte la pussibilitât (no l'oblic) di declarâ la proprie volontât (consens o dinei) su la donazion di orghins e di tiessûts dopo de muart, midiant di chestis modalitâts:

1. la regjistrazion de proprie volontât li de Asl di riferiment. Chestis declarazions a son regjistradis daurman intal Sisteme Informatîf Traplants (SIT), la base di dâts dal Centri Nazionâl Traplants, che i miedis dal coordenament a puedin consultâ in maniere sigure 24 oris su 24
2. la compilazion dal "tessarin blu" dal Ministeri de Salût o dal tessarin di une des associazions di setôr ADO e AIDO, che e à di jessi conservade insiemi cui documents personâi
3. cualsisedi declarazion scrite che e vedi dentri non, cognon, date di nassite, declarazion di volontât (positive o negative), date e firme (calcolade valide pes finalitâts de declarazion dal Decret ministeriâl dai 8 di Avrîl dal 2000), ancje cheste di conservâ tra i documents personâi.

Intal câs di donadôr potenziâl (sogjet che e sedi stade aciertade la muart cun criteris neurologjics), i miedis rianimadôrs a verifichin se chest al à cun se un document che al ateste la sô declarazion di volontât o se cheste e risulti regjistrade intal SIT.

Se un citadin nol esprim la sô volontât in vite, la leç e previôt la pussibilitât pai familiârs (coniugât no separât, convivent more uxorio, fîs maiôrs di etât e gjenitôrs) di oponisi al prelêf dilunc dal periodi di aciertament de muart. Duncje, al è ben fevelâ ancje cui propris familiârs, stant che, tal câs che e mancji une declarazion, a saran interpelâts dai miedis su la volontât esprimude in vite dal parint. Pai minôrs a son simpri i gjenitôrs a decidi, e se ancje dome un dai doi al è contrari, il prelêf no si pues fâ.

Il citadin al pues cambiâ la declarazion di volontât in cualsisedi moment. E sarà simpri calcolade valide la ultime declarazion fate in ordin di timp tes modalitâts previodudis.

Riassumint, in câs di muart a puedin verificâsi trê situazions:

1. il citadin al à esprimût in vite la volontât positive ae donazion, e in chest câs i familiârs no puedin oponisi: donazion sì;
2. il citadin al à esprimût la volontât negative ae donazion, e in chest câs i orghins no si prelevin: donazion no;
3. il citadin no si è esprimût, e in chest câs il prelêf al è permetût se i familiârs no si oponin: donazion sì/no (la informazion ai familiârs su la ativazion de procedure di aciertament di muart cun criteris neurologjics e je obligatorie).