La donazion dal sanc cordonâl

Zentîi futûrs gjenitôrs,
o sês daûr a dâ acet al regâl di une gnove vite. In chest moment tant impuartant, o vês la pussibilitât di donâ il sanc dal cordon umbilicâl tal moment dal part. Chest sanc donât al pues jessi doprât par curâ soredut fruts cun malatiis ematologjichis.

Il sanc cordonâl

Il sanc cordonâl al è il sanc che al reste intai vâs sanghins dal cordon e de placente dopo taiât il cordon umbilicâl dal neonât. Chest sanc, plen di celulis staminâls emopoietichis, al pues jessi racuelt, conservât e donât; in alternative, al ven smaltît adun cu la placente.

Lis celulis staminâls emopoietichis dal sanc cordonâl a son ogjet di studis e di ricercjis che a àn dimostrât in maniere clare la lôr capacitât di gjenerâ lis celulis dal sanc (globui ros, globui blancs e placutis), similis a chês de medole dai vues e a son dopradis par curâ personis, massime fruts, che a àn malatiis tumorâls dal sanc, tant che la leucemie, i linfomis (tumôrs dal sisteme linfatic), patologjiis no tumorâls tant che la talassemie (malatie ereditarie dal sanc), la aplasie de medole (no si produsin lis celulis dal sanc) e lis imunodeficiencis congjenitis (malfunzionaments dal sisteme imunitari che a predisponin aes infezions fin de nassite).

Par chestis resons, la ASUFC e sosten za di agns la donazion dal sanc cordonâl.

La donazion

Il sanc dal cordon umbilicâl al è donât par jessi metût a disposizion de coletivitât. La donazion e je volontarie, gratuite e anonime. La donazion dal sanc cordonâl no compuarte pericui ni pe mari ni pal frut.

La racuelte e la conservazion no compuartin nissune spese pe donadore e pe famee.

La procedure

La racuelte dal sanc cordonâl si fâs intant dal part, dopo nassût il frutin, sedi tal câs di part spontani che di tai cesari. Il prelêf si fâs dopo vê taiât il cordon umbilicâl, midiant di une tecniche sterile cuntune gusiele colegade a une sache fate di pueste.

La mari si rint disponibile ancje a un prelêf di sanc tal moment dal part e dopo 6-12 mês de donazion, par escludi malatiis infetivis in cors o in incubazion.

Racuelte alogjeniche

La Aziende e mande ogni unitât di sanc cordonâl racuelte te sale part ae Bancje dal sanc dal cordon umbilicâl di Padue: li a fasaran diviers controi specifics par verificâ la idoneitât ae conservazion e par definî lis carateristichis imunologjichis che a coventin par stabilî la compatibilitât fra donadôr e ricevent.
Dopo, i dâts su lis unitâts di sanc cordonâl conservadis inte bancje a vegnin comunicâts al Regjistri internazionâl dai donadôrs di medole dai vues, di mût che lis unitâts a sedin a disposizion di dut il mont.

In Italie, lis bancjis di sanc cordonâl, istituidis dome dentri di struturis publichis, a son ativis su la fonde di standards di cualitât e di sigurece definîts a nivel statâl e internazionâl. Cumò la rêt taliane e je componude di 18 bancjis, distribuidis su dut il teritori nazionâl, e e je coordenade a nivel centrâl dal Centri Nazionâl Sanc in colaborazion cul Centri Nazionâl Traplants.

Racuelte dedicade

In Italie si pues conservâ il sanc dal cordon umbilicâl par ûs autolic (donazion dedicade), o ben personâl, dome intai câs che tra i parincj di sanc dal nassint e sedi une patologjie che par chê al è ricognossût valit e apropriât di un pont di viste clinic l'ûs terapeutic des celulis staminâls dal sanc di cordon umbilicâl (liste ripuartade inte zonte al Decret ministeriâl dai 18 di Novembar dal 2009, inzornât in maniere periodiche). In chest câs, lis celulis staminâls a son racueltis te stesse maniere de racuelte alogjeniche e conservadis a gratis intes bancjis talianis.