Donâ il lat materni

Il lat de proprie mari, fresc o conservât in maniere adeguade, al è l'aliment ideâl ancje pai neonâts pretiermin. Cuant che nol è disponibil o nol baste, il lat uman donât al rapresente la miôr alternative.

I vantaçs principâi che a vegnin dal ûs dal lat uman di bancje inte alimentazion dai neonâts pretiermin a son:

• basse incidence di enterocolite necrotizante
• incidence limitade di sepsi e di altris infezions
• incidence limitade di displasie broncopolmonâr

La bancje dal lat uman donât (BLUD) e je une realtât a Udin dal 1966 e e je in evoluzion costante. Il servizi al à la finalitât di selezionâ, racuei, conservâ e distribuî il lat uman donât, e di doprâlu par dibisugnis medichis specifichis.

La BLUD e sodisfe lis dibisugnis dai neonâts pretiermin, ma e je utile ancje in altris situazions, su la fonde di indicazions medichis precisis: par esempli, pai rârs câs di neonâts a tiermin che par periodis curts no puedin jessi alimentâts al sen, o par neonâts cun patologjiis. La esecuzion curade des proceduris operativis e permet un bon ecuilibri tra sigurece dal ûs e cualitâts biologjichis.

Il lat de femine, come i orghins o i tiessûts umans, nol pues jessi comercializât: la donazion e je gratuite e e je garantide la privacy. La sigurece e la cualitât dal lat uman donât a àn la lôr colocazion plui adate intun contest che al previôt la promozion, la protezion e la poie dal latament al sen ancje pai neonâts cun problemis e pretiermin.

Destinataris: al è indreçât aes maris di neonâts e di fruts di mancul di 12 mês.

Carateristichis: scandai infetivologjic negatîf, assence di compuartaments periculôs (assunzion di sostancis di abûs, fum di sigaret)