Ingrès pes curis
L'art. 36 dal T.U. 286/98 al previôt l’ingrès in Italie par curis di citadins forescj che a vegnin di Paîs extracomunitaris là che no son, o che a son acessibilis cun dificoltât, competencis medichis specialistichis pal tratament di patologjiis specifichis.
La consegne dal permès di permanence par curis medichis no permet la iscrizion al Servizi Sanitari Nazionâl, fûr che tal câs di permès par curis dât a feminis in gravidance.
Forest che al domande il vistât di ingrès par curis medichis
Par otignî il vistât di ingrès par curis medichis, il forest al à di domandâ cheste documentazion ae Ambassade taliane, o pûr al Consolât competent par teritori intal so Paîs di origjin:
-
declarazion de struture sanitarie sielte, publiche o privade increditade, che e ripuarti il gjenar di cure che e je di fâ, la date di principi e la durade presumibile de cure, la durade de eventuâl degjence previodude, osservant lis disposizions in vore pe tutele dai dâts personâi
-
atestazion di vê paiade un cauzion daûr dal cost presumibil des prestazions domandadis. Il dipuesit de cauzion, in euros o in dolars statunitens, al varà di corispuindi al 30 par cent dal cost complessîf presumibil des prestazions domandadis, e al varà di jessi paiât ae struture sielte
-
documentazion che e dimostri la disponibilitât in Italie di risorsis suficientis par paiâ dutis lis spesis sanitariis, chês pe mangjative e pal lozament fûr de struture sanitarie, e pal rimpatri dal assistût e dal eventuâl acompagnadôr
-
certificazion sanitarie, che e descrîf la patologjie dal richiedent, intal rispiet des disposizions in materie di tutele dai dâts personâi. La certificazion dade fûr tal forest e à di jessi voltade par talian.
Il 70% des spesis che al mancje al à di jessi paiât de persone foreste, o dal so garant.
Forest che al ven trasferît in Italie par curis, intal ambit di intervents umanitaris
Su la fonde dal art. 12 - come 2 - letare c) dal Decret legjislatîf 30.12.92 n. 502, daûr des modifichis dal Decret legjislatîf 7.12.93 n. 517.
In cheste ipotesi, l’ingrès par curis dal citadin forest resident intun Paîs che nol à struturis sanitariis idoniis e adeguadis, al à di jessi autorizât dal Ministeri de Salût, in cunvigne cul Ministeri dai Afârs Forescj. Il Ministeri de Salût al individue la struture sanitarie e al garantìs il paiament des spesis sanitariis.
Forest che al ven trasferît in Italie intal ambit di programs di intervent umanitari des Regjons
Su la fonde dal art. 32 - come 15 - de leç 27.12 1997, n. 449.
Lis Regjons, in cunvigne cul Ministeri de Sanitât, a puedin autorizâ lis Unitâts Sanitariis Locâls e lis Aziendis ospedalieris a furnî prestazions di alte specializazion, che a son previodudis dentri di programs assistenziâi aprovâts des Regjons, a pro di:
-
citadins forescj che a vegnin di Paîs extracomunitaris là che no son, o che a son acessibilis cun dificoltât, competencis medichis specialistichis pal tratament di patologjiis specifichis gravis, e li che no son in vore acuardis di reciprocitât su la assistence sanitarie
- citadins di Paîs che a àn une situazion contingjente particolâr par resons politichis, militârs o di altre nature, che no rindin pussibil atuâ i acuardis in vore pe erogazion de assistence sanitarie de bande dal Servizi Sanitari Nazionâl.