Laboratoris estîfs par fruts, fantats, zovins e fameis

Miercus ai 15 di Jugn a àn tacât - e a laran indevant par dut l'Istât - lis ativitâts par fruts, fantats, zovins e fameis promovudis di cualchi Aministrazion comunâl dal teritori e dal Servizi sociâl dai Comuns dal ambit teritoriâl dal Glemonàs e dal Cjanâl dal Fier-Valcjanâl. 

Lis ativitâts, inmaneadis dai operadôrs de cooperative sociâl Aracon, aderente ae Associazion temporanie di Impresa «Cooperative Itaca – Universiis – CODESS FVG – Aracon» e che e opere su mandât dal Servizi sociâl, a son indreçadis a diferentis fassis di etât.

I laboratoris «Tuttintondo», in program o daûr a davuelzisi intai comuns di Dartigne, Bordan e Pontêbe, a son indreçâts a fruts di etât tra i 12 e i 18/36 mês e ai lôr gjenitôrs.

A son cinc i laboratoris «Tuttinsieme» pai fruts dai 6 ai 10 agns (a Trasaghis intal mês di Lui), tra i 3 e i 6 agns (a Bordan intal mês di Lui, cu la pussibilitât di lâ indenant in Avost e Setembar, e a Vençon intal mês di Avost) e tra i 3 e i 10 agns (a Scluse a fin di Avost-Setembar, dopo dal prin cicli che si è sierât ai 29 di Jugn, e a Resiute, intai mês di Lui e Avost).

Al è indreçât ai zovins tra i 14 e i 17 agns il percors «Teen Lab» che si fasarà a Glemone di lunis ai 18 a miercus ai 27 di Lui, cun doi apontaments par setemane, il lunis e il miercus, des 15.00 aes 17.00, li de aree esterne e te palestre de Scuele primarie di Plovie. Il program dal percors al è vari. A son previodûts: un laboratori di produzion musicâl cul produtôr e fonic Dave March; un laboratori pe creazion de t-shirt dal Istât cu la formadore e creative Antonietta Nimis; un incuintri di svicinament al tenis e, par sierâ, un laboratori a sorprese che al sarà progjetât a partî dai stimui e des propuestis che a rivin dai partecipants ai apontaments precedents.

Ducj i laboratoris a son gratuits e a àn chescj obietîfs: promovi l'incuintri cun chel altri - des primis interazions tra picinins, aes relazions tra chei plui granduts, orientadis a confrontâsi e a colaborâ -, valorizâ risorsis, atitudins e abilitâts dai partecipants, promovi la autonomie e la esplorazion dal ambient (par chei plui piçui) e sperimentâ lengaçs, tecnichis e struments di gjenars diviers (par chei plui grancj).

Par partecipâ si à di notâsi daûr di ce che al è indicât tai volantins di promozion des iniziativis che a son ripuartâts chi sot.