Inovazion tecnologjiche pe sanitât F-VJ: lis imagjins diagnostichis si viodin su Sesamo
Fra i prins in Italie, i citadins dal F-VJ a podaran sielzi di cjalâ e discjamâ daurman tai lôr dispositîfs lis imagjins dai esams diagnostics che a son tal Fassicul Sanitari Eletronic
Si slargjin i servizis pai citadins ufierts dal Fassicul Sanitari Eletronic, dulà che si jentre lant sul portâl "Sesamo – Servizis Salût in mobilitât”. La Direzion Centrâl Salût, di fat, e à comunicât une evoluzion strategjiche dal Fassicul Sanitari Eletronic: di cumò indevant i citadins a podaran consultâ lis imagjins diagnostichis dai lôr esams, cjalâlis e discjamâlis tai lôr dispositîfs.
Cuant che il citadin al prenote lis prestazions di radiologjie e di medisine nucleâr, al podarà sielzi se cjalâ e discjamâ lis imagjins midiant di Sesamo o ritirâ il CD pazient tai sportei de struture publiche.
La sielte si podarà fâle tal moment de prenotazion o de acetazion in struture. In ogni câs e reste valide la opzion di domandâ la produzion dal CD pazient, cu lis modalitâts za in vore.
Al è impuartant specificâ che cheste funzion e je disponibile dome pai citadins che a àn il Miedi di Medisine Gjenerâl, il Pediatre di Libare Sielte o che a son iscrits al ASAP (Ambulatori Sperimentâl di Assistence Primarie) tal Friûl-Vignesie Julie.
Tal Fassicul Sanitari Eletronic a son za disponibii lis imagjins diagnostichis e i referts colegâts dai esams fats tai ultins 10 agns e archiviâts tal sisteme PACS regjonâl. Si podaran cjalâ e discjamâ lis imagjins dopo 24 oris che il refert è stât firmât.
Cun vuê a son disponibilis ancje lis imagjins associadis ai referts dai acès tal Pront Socors o dai ricovars tal ospedâl, dopo che a son stâts emetûts il verbâl dal Pront Socors o la letare di dimission dal ospedâl.
A nivel tecnic, tignint cont de grande dimension dai files, al sisteme i podaressin coventâ fin a 3 oris di cuant che si domande il download par preparâ i documents.
Si specifiche che lis funzions par cjalâ e discjamâ lis imagjins a son disponibilis dome jentrant tal portâl Sesamo dal sît internet (https://sesamo.sanita.fvg.it/sesamo), doprant un normâl program di navigazion su computer o su smartphone, e no midiant de app pai dispositîfs mobii.