A son tacadis lis prenotazions pe cuinte dose dal vacin antiCovid

Cun lunis ai 24 di Otubar, aes 12, al è pussibil prenotâ la cuinte dose de vacine anti Sars-Cov-2/Covid-19 (tierç riclam/booster) ancje par cui che al à plui di 60 agns.

Lu fâs savê il vicegovernadôr e assessôr cun deleghe ae Salût dal Friûl-Vignesie Julie Riccardo Riccardi.

Chest riclam al è racomandât prime di dut pes personis cun plui di 80 agns, par chês cun plui di 60 cun fragjilitâts, e pai ospits des cjasis di polse.

E je une vore racomandade par chês personis, tacant dai 12 agns, che a àn problemis tal sisteme imunitari: personis sometudis a traplant di orghin solit in terapie imunosopressive, traplant di celulis staminâls ematopoietichis dentri di 2 agns dal traplant o in terapie imunosopressive par malatie croniche dal traplant cuintri l'ospit; o citadins in spiete di traplant, o pûr sometûts a terapie a base di celulis "Cart" o cun farmacs imunosopressîfs o mielosopressîfs par patologjiis oncologjichis o oncoematologjichis o che a àn fat chestis terapiis di mancul di 6 mês; pazients cun imunodeficiencis primitivis o secondariis a tratament farmacologjic, in dialisi e cun insuficience renâl croniche grave, pregresse splenectomie o asplenie, sindrome di imunodeficience acuiside.

Il riclam al ven fat cu lis vacinis a mRna bivalentis (Pfizer BioNTech Comirnaty adatât cuintri des variantis Omicron BA.4-BA.5), baste che a sedin passâts almancul 120 dîs dal ultin riclam o di une infezion pregresse cun Sars COV-2. Tal prenotâ al è pussibil sielzi ancje la vacine bivalente SpikeVax (Moderne) adatade cuintri Omicron BA.1.

Si pues fâ il riclam anti COVID-19 adun cu la vacine antiinfluençâl, o pûr a pôcs dîs di distance une di chê altre.

Font Regjon F-VJ