Sportel informatîf DAT (Disposizions Anticipadis di Tratament)
Servizi di orientament promovût de Medisine Legâl par informâ i citadins su sieltis di cure, consens informât, Disposizions Anticipadis di Tratament e figuris di tutele juridiche.
Cul 1n di Setembar, li de Medisine Legâl de Aziende Sanitarie Universitarie Friûl Centrâl al è atîf il Sportel Informatîf dedicât aes Disposizions Anticipadis di Tratament (DAT) e ae Leç 219/2017.
Midiant di chest servizi, un Miedi Legâl al ufrìs consulence cualificade, supuart informatîf e sclariments tecnics ai citadins che a vuelin aprofondî la normative in vore e lis modalitâts di tutele dai lôr dirits in ambit sanitari.
Il sportel al à l'intindiment di vuidâ l'utent tal capî lis dinamichis ingredeadis medichis e juridichis peadis aes decisions in merit al propri percors di cure. Lis areis di intervent principâls a cjapin dentri:
- Disposizions Anticipadis di Tratament (DAT): Sclariments su lis modalitâts che ogni persone e pues doprâ par esprimi vuê, tal câs che un doman no ves plui di jessi bon di autodeterminâsi, il so consens o mancul a trataments sanitaris specifics. Si dan indicazions detaiadis sui dirits dal citadin, su lis implicazions des sieltis di cure, e ancje su lis proceduris coretis par scrivi e depositâ il document.
- Consens Informât e Planificazion des Curis in Condivision (PCC): Aprofondiment dal dirit fondamentâl dal pazient ae informazion e ae partecipazion ative de persone al so percors terapeutic.
- Rûi e Figuris di Tutele Juridiche: Analisi des diferencis operativis, des competencis e dai podês che a spietin aes diviersis figuris previodudis dal ordenament, par esempli Tutôr, Curadôr, Aministradôr di Sostegn, Procuradôr e Fiduciari.
Par fissâ un apontament in presince, par telefon o ben in linie si à di clamâ il numar 3358383155 il vinars des 10:00 aes 12:00 o pûr scrivi ae direzion di pueste eletroniche medicinalegale.sportellodat@asufc.sanita.fvg.it .
La sede de Medisine Legâl e je a Udin, in vie Puçui 330 te Palacine n. 6.