Ricognossiment internazionâl pe salût mentâl dai zovins
L'ambulatori "PRIMA" sielt pai percors di transizion dai servizis pai minôrs di etât a chei pai adults
Ricognossiment internazionâl straordenari pal ambulatori PRIMA (PRecocity of Intervention in Adolescent Medicine) di ASUFC: il servizi al è stât selezionât in vie uficiâl de task force europeane pai percors di transizion in salût mentâl dai servizis pai minôrs di etât a chei pai adults.
L'ambulatori al è stât sielt tant che vêr e propri model talian in gracie de sô capacitât di ufrî une leture vaste e struturade dal delicât procès di transizion dai pazients zovins.
LA ATIVITÂT DAL AMBULATORI PRIMA
L'ambulatori PRIMA al è un servizi specialistic, nassût tal mês di Novembar dal 2021, dedicât a zovins tra i 16 e i 35 agns, progjetât par intercetâ in anticip il malstâ psicologjic intune fase de vite dulà che il pericul di disvilupâ disturps psichiatrics al è une vore alt.
Il servizi al funzione tant che pont di acès "intermedi" par garantî continuitât assistenziâl, contrastant la interuzion des curis che si verifiche spes cuant che si passe ai servizis pe etât adulte. Cuntun svicinament multidissiplinâr e centrât su la persone, PRIMA al ufrìs valutazions clinichis, intervents psicologjics e farmacologjics par frontâ sintoms come ansie, disturps dal umôr e problemis dal sium, cun in plui un rûl fondamentâl di orientament viers i percors specifics (par es. disturps dal neurosvilup, disturps alimentârs o risi psicotic) o ben il follow-up tal ambulatori.
"UN PERCORS CHE AL NAS DI LONTAN"
Il prof. Marco Colizzi, diretôr de Cliniche Psichiatriche: "Si trate di un ricognossiment straordenari, che al fâs cuasi maravee, ma che al nas di lontan: i prins lavôrs di riflession su la struturazion di chescj servizis a van indaûr al 2019-2020.
Gracie ae Direzion di ASUFC e dal Dipartiment di Salût Mentâl e des Dipendencis al è stât costruît a Udin l'ambulatori dedicât ae transizion che cun chestis premessis al à permetût di esplorâ svariâts elements clâf di chest procès: dal servizi che al invie ai trataments za fats, des eventuâls diagnosis (cjapant dentri ancje chês riferidis ai disturps dal neurosvilup) aes esperiencis scolastichis e di traume, fin aes dibisugnis di ingrès, ai esits in jessude e a cetancj altris aspiets rilevants. Tra chescj e je ancje da durade di malatie no tratade, che e risulte plui curte rispiet aes mediis che si spietavisi, ma che e continue dut câs a segnalâ un gap significatîf tra i servizis pai minôrs di etât e chei pai adults".
I DÂTS DAL AMBULATORI
Si acêt al ambulatori cence impegnative; dal mês di Novembar dal 2021 a vuê a son rivâts plui di 200 zovins.
Tra di chescj:
- Un pazient su doi al à mancul di 20 agns
- Il 25% al è inviât dal miedi di medisine gjenerâl, un altri 25% al rive in autonomie
- Pal 90% dai pazients e je la prime visite intun servizi par adults
- Un pazient su trê al presente un disturp dal neurosvilup (par esempli autisim, ADHD)
"Dal sigûr chest ricognossiment al è il risultât dal lavôr une vore bon che o stin puartant indenant - al siere il prof. Colizzi - ma al reste ancjemò tant ce aprofondî: al è simpri plui evident trop che al è impuartant continuâ a invistî e cjalâ in cheste direzion pal futûr de salût mentâl".