Cors di Lauree in Infermieristiche F-VJ - premi di studi regjonâl
La Regjon Friûl-Vignesie Julie e invistìs te formazion dai professioniscj de salût dal avignî, dant un supuart economic a cui che al sielç di iscrivisi ai Cors di lauree in Infermieristiche ativâts dai Ateneus di Triest e di Udin.
Cul an academic 2024/2025 al è istituît un premi di studi anuâl destinât aes studentis e ai students che a scomencin e a finissin cun profit il percors universitari, e che a sielzin dopo di meti lis lôr competencis al servizi dal Sisteme Sanitari Regjonâl.
Il benefici al è regolât de Leç regjonâl n. 12/2025.
Entitât dal premi
Il premi di studi al è di 3.300 euros sporcs par ogni an di cors e si pues cumulâ cun altris premis, assegnazions o borsis di studi.
Tal câs che il premi al sedi incompatibil in mût totâl o parziâl cun altris misuris contributivis si pues rinunziâ ae assegnazion o pûr domandâ di ridusilu par garantînt la compatibilitât.
Destinataris
Il premi al è destinât ai students e aes studentis iscrits ai Cors di lauree in Infermieristiche:
- te Universitât dai Studis di Triest
- te Universitât dal Friûl
Recuisîts
Par vê acès al premi si à di:
- jessi residents in Friûl-Vignesie Julie ai 31 di Zenâr dal an di concession (cence limits di etât).
Prin an di cors:
- jessi imatricolâts intune des sedis regjonâls dal Cors di lauree in Infermieristiche;
- vê otignût almancul il 50% dai credits formatîfs universitaris (CFU) previodûts pal an dentri dai 30 di Setembar dal an di concession.
Secont e tierç an di cors:
- jessi iscrits in regule intune des sedis regjonâls;
- vê frecuentât i agns di cors in mût consecutîf;
- vê otignût, dentri de ultime session utile dal an academic prime, almancul il 60% dai CFU complessîfs previodûts pai agns prime;
- jessi in regule cul percors di studis.
Modalitâts di acès
Par otignî il premi si à di partecipâ al bant publicât dal Ateneu di riferiment e presentâ la domande midiant dai portâi uficiâi:
- Universitât dai Studis di Triest;
- Universitât dal Friûl.
I Ateneus:
- a verifichin il possès dai recuisîts;
- a scrivin une graduatorie di merit par ogni an di cors, su la fonde dai credits otignûts.
Tal câs di paritât di ponts, e prevâl la etât anagrafiche plui basse.
Lis graduatoriis a puedin vê un scoriment in presince di plui risorsis disponibilis.
Mantigniment dal premi
Il premi al à di jessi tornât tal an di riferiment tai câs elencâts:
- interuzion dai studis (rinunzie, sospension o interuzion), fale i câs previodûts de normative in vore (par es. in câs di gravidance o di infermitâts gravis documentadis);
- trasferiment intun altri cors di lauree o intun Ateneu fûr dal Friûl-Vignesie Julie prin di vê otignût il titul;
- no vê otignude la lauree dentri de ultime session utile dal tierç an regolâr (i students "fûr di cors" no àn dirit al premi);
- iregolaritâts aministrativis, come no vê regolarizadis lis tassis universitariis pal an di riferiment.
Un percors viers il lavôr tal Servizi Sanitari Regjonâl
Il premi nol rapresente dome un supuart economic, ma ancje une oportunitât reâl di inseriment professionâl tal mont dal lavôr.
Cui che al acete il premi si impegne:
- a partecipâ, tai trê agns dopo de lauree, aes proceduris di selezion par infermîrs bandidis dai ents dal Servizi Sanitari Regjonâl;
- tal câs che al sedi assumût a timp indeterminât, a prestâ servizi tal Servizi Sanitari Regjonâl dal Friûl-Vignesie Julie par almancul cinc agns;
- tal câs di contrat a timp determinât, a garantî la permanence par dute la durade de incarghe (se cheste e dure mancul di cinc agns).
La misure e à il fin di valorizâ lis competencis cjapadis sù sul teritori e di infuartî in mût stabil la cualitât dal Servizi Sanitari Regjonâl. In plui e rapresente un impegn di continuitât che al favorìs l'inseriment professionâl in Friûl-Vignesie Julie, judant a fâ cressi il Sisteme Sanitari Regjonâl e a formâ lis prossimis gjenerazions di professioniscj.